Partiya Herêmên Demokratîk (DBP) Buroya Çapemeniyê ya Jinan, derbarê polîtîkayên hedefgirtin, gefxwarin û çavtirsandinê yên li dijî jinên rojnamevan de daxuyaniyeke nivîskî weşand. Di daxuyaniya bi sernavê “Li dijî polîtîkayên zext û çavtirsandinê em li cem jinên rojnamevan in” de, hate destnîşankirin ku jinên rojnamevan ên li Kurdistanê ji ber parastina mafê gel ê agahîgirtinê bi awayekî sîstematîk tên hedefgirtin. Hate gotin ku kedkarên çapemeniya azad, ku dengê jinan û şahidê rastiyê ne, di salên dawî de bi lêpirsîn, binçavkirin û gefan re rû bi rû dimînin û hewl tê dayîn ku rojnamevanî bibe amûreke xizmeta hin navendan.
NÛÇEYA ROJÎN KABAÎŞ MIJARA LÊPIRSÎNÊ BÛ
DBP’ê bi bîr xist ku ji ber nûçeyên derbarê mirina bi guman a xwendekara Zanîngeha Yuzuncu Yil a Wanê, Rojîn Kabaiş, lêpirsîn li ser jinên rojnamevan hatine destpêkirin. Di daxuyaniyê de hate ragihandin ku nûçeya angaşta “karmendê ewlehiyê yê zanîngehê di hefteya mirina Rojîn Kabaiş de reviyaye derveyî welat” her çendî berjewendiya raya giştî tê de hebe jî, bûye mijara lêpirsînê. Ev yek wekî parçeyek ji polîtîkayên zextê yên li dijî peywira rojnamevanan a derxistina rastiyê hate binavkirin.
DIXWAZIN TEŞHÎRKIRINA POLÎTÎKAYAN BÊ ASTENGKIRIN
Di daxuyaniyê de ev tişt hatin gotin: Polîtîkayên şerê taybet ên li dijî jinên ciwan ên li Kurdistanê, hem qadên jiyanê yên jinan teng dikin, hem jî jinên rojnamevan ên ku van polîtîkayan teşhîr dikin rasterast dikin hedef. Ev êrîşên li ser ajansên nûçeyan ên jinan û rojnamevanan, ne tenê hewldaneke bêdengkirina nûçeyekê ye; di heman demê de hewldaneke tepeserkirina berxwedana jinên ciwan, hêza wan a pirsyariyê û vîna wan a anîna ziman a heqîqetê ye.
