Li gorî peymana agirbestê ya ku li ser bingeha plana Serokê DYE’yê Donald Trump hatiye amadekirin, tê payîn ku bi vekişîna gav bi gav a artêşa Îsraîlê re wê hêzek aramiyê ya navneteweyî ku bi piranî ji welatên Ereb û Misilman pêk tê li Xezeyê bên bicihkirin. Tirkiye xwestibû tevlî vê hêzê bibe, lê Tel Avîv bi eşkereyî li dijî vê daxwazê derdikeve.
Saar di civîna çapemeniyê ya hevpar a ligel Wezîrê Derve yê Macaristanê Peter Szijjarto li Budapeştê axivî û got, “Welatên ku difikirin leşkeran bişînin Xezeyê divê herî kêm bêalî bin. Ne şert e ku ew dostên Îsraîlê bin, lê divê ne di nava hewldanên dijminane bin.”
Saar anî ziman ku Tirkiyeyê “nêzîkatiyeke dijminane li hember Îsraîlê pejirandiye” û got, “Ev tenê bi daxuyaniyên tund ve ne sînordar e; gavên dîplomatîk û aborî jî di nava xwe de dihewîne. Ji ber vê yekê, ne maqûl e ku em destûrê bidin artêşa Tirkiyeyê ku bikeve Xezeyê. Me ev yek bi eşkereyî ji dostên xwe yên DYE’yê re jî got.”
Serokwezîrê Îsraîlê Binyamin Netanyahu rojek berê ragihandibû ku ew mafê xwe yê vetoyê li ser endamên hêza navneteweyî ya ku wê piştî şerê Xezeyê ewlehiyê misoger bikin, diparêzin.
Netanyahu careke din anî ziman ku ew ê dijberiya xwe ya li hember tevlîbûna Tirkiyeya ku têkiliyên wê bi Hamasê re hene ya nav vê hêzê destnîşan bikin û got, “Em ê hêzên ku ji bo Îsraîlê nayên qebûlkirin diyar bikin.”
