Rêveberiya Tevgera Azadiya Kurd li Qendîlê bi daxuyaniyeke dîrokî ragihand ku bi erêkirina Rêber Apo û li gorî biryarên Kongreya 12’emîn a PKK’ê, wan dest bi vekişandina hêzên xwe yên li Tirkiyeyê bo Herêmên Parastinê yên Medyayê kirine. Di daxuyaniyê de hat gotin ku gerîlayên Hêzên Parastina Gel (HPG) û Yekîneyên Jinên Azad-Star (YJA-Star) dest bi vekişîna xwe bo “Herêmên Parastinê yên Medyayê” kirine. Di çarçoveya vê biryarê de navê 25 gerîlayên HPG û YJA-Star ên vekişiyane jî di daxuyaniyê de hatibû parvekirin.
Nivîskar Veysel Avcı, derbarê biryara vekişînê ya Tevgera Azadiya Kurdistanê de ji ANF’ê re axivî û ev tişt anîn ziman: “Divê ev pêvajoya vekişînê ji pêvajoyên vekişînê yên berê cuda bê nirxandin. Bi taybetî ev vekişîn di bin agahiya hevdîtinên bi dewletê re de pêk tê. Divê ev yek wek encama hevdîtinên bi dewletê re, yên di girêdanê bi vekişînên berê re, bê nirxandin. Tevgera siyasî ya Kurd ne wisa ji nişka ve hêzên xwe vekişandiye. Biryareke ku di Kongreya 12’emîn de hatiye girtin heye.
Di vê biryarê de PKK xwe fesix kir û biryara vekişandina hemû hêzên xwe yên leşkerî yên li nava welêt girt. Em hemû şahidê merasîma şewitandina çekan bûn. Ji ber vê yekê, mijara bingehîn ev e ku tişta ji aliyê PKK’ê an jî tevgera siyasî ya Kurd ve bê kirin, ji bo aştiyê her tiştî daye ber çavan. Em dikarin vê yekê wekî daxuyaniya fesix kirina xwe, avêtina tundiyê ji derveyî rêbaza bingehîn a têkoşînê û ragihandina biryara têkoşîna demokratîk bibînin. Wekî din, di vê pêvajoyê de ti çalakiyeke leşkerî ji aliyê PKK û tevgera siyasî ya Kurd ve pêk nehatiye. Bi taybetî li ser vê xalê gelek baldarî hatiye nîşandan. Di pêvajoyên berê de, hin hêzên di nava dewletê de ji bo têkbirina pêvajoyeke wiha, hin çalakiyên provokatîf kirin. Îro em dibînin ku tevgera siyasî ya Kurd û Rêberê wê, Birêz Abdullah Ocalan, di vî warî de her tiştê ji destê wan hatî kiriye.”
DIVÊ DEWLET VÊ GAVÊ RAST BINIRXÎNE
Avcı, anî ziman ku ji bo pêvajoya aştiyê bi erênî pêş ve biçe, êdî berpirsiyariyeke mezin dikeve ser milê dewletê û baskê desthilatdariyê. Avci axaftina xwe wiha domand: “Nêzî salekê ye ku tevgera siyasî ya Kurd her gavekî ku ji aliyê wê ve bê avêtin kiriye. Soza serlênedana têkoşîna çekdarî daye. Gavên herî dawî jî vekişandina hêzên xwe yên leşkerî ji nava sînorê Tirkiyeyê ye. Ev gav pir girîng e. Ev gav, bi wateyekê dibêje ku ew tevdîrên heyî yên li hemberî dewletê jî radike. Her dem Kurd di bin metirsiya qirkirinê de ne. Xema vê yekê heye. Tevgera siyasî ya Kurd ev tedbîr girtiye.
Divê dewlet vê gavê rast binirxîne. Vekişîn tê wateya pabendbûna bi sozên hatine dayîn û gav bi gav wan bixe pratîkê. Bi wateyekê, Kurdan li ser aştiyê biryara xwe nîşan dan. Hemû qonaxên wê bê kêmasî bi cih anîn. Baş e, çima dewlet di beramberî vê yekê de salek e gavek navêje? Pirsa ku divê bê pirsîn ev e. Di vî warî de divê tenê ji dewletê hesap neyê pirsîn. Hemû kesên beşdarî komîsyonê bûne û partiyên siyasî di vî warî de berpirsyar in. Bi taybetî berpirsiyariya herî mezin a MHP’ê ye. MHP, di vê mijarê de tenê bi daxuyaniyan di nava pêvajoyê de dimîne.”
DIVÊ PÊVAJOYA HIQÛQÎ DEST PÊ BIKE
Avci anî ziman ku ji roja destpêkirina pêvajoyê ve, tevgera siyasî ya Kurd di avakirina aşitî û civaka demokratîk de israrker bûye û wiha dewam kir: “Tevgera siyasî ya Kurd, bi gavên xwe yên şênber dibêje rêyên çareseriya demokratîk hene. Lê dewlet di vî warî de ti gavek neavêtiye. Divê komîsyona Meclîsê demildest bi Birêz Ocalan re hevdîtinê bike. Dewlet jî divê gavên xwe yên hiqûqî biavêje. Heta ku ev gav neyên avêtin, fikar di nava civakê de çêdibin. Civak baweriya xwe ya bi vê pêvajoyê winda dike. Pêwîst e ev yek bê rastkirin. Divê rêziknameyên hiqûqî yên ku tevahiya civakê îqna bikin bêne kirin. Divê neavêtina gavên dewletê bê pirsîn. Divê hemû alî beşdarî vê pêvajoyê bibin. Ev pêvajo wê bi herkesi bide qezenc kirin.”
