Komîteya Rêveber a Tevgera Şoreşa Yekbûyî ya Gelan (HBDH) daxuyanî da û salvegera 108’an a Şoreşa Cotmehê ku ji bo hemû kedkarên cîhanê xala werçerxê ye, silav kir. HBDH’ê got, “Dengên topan ên ku 7’ê Mijdara 1917’an qesra Petrograd hejandî, bû şevtirska bûrjûwaziya cîhanê û bû hêviya proletaryayê. Şoreşa Cotmehê ya bi rêbertiya Partiya Bolşevîk, pêşengiya Lenîn û şîara ‘ji hemû sovyetên desthilatdar re!’ pêş ket, weke meşaleya ku rêya rizgariyê ya mirovahiyê ronî dike hîna dişewite. Şoreşa Cotmehê li dijî hovîtiya kapîtalîzmê serhildaneke proleter bû. Di salvegera 108’an a Şoreşa Cotmehê de divê em li dijî emperyalîzm, kapîtalîzm û faşîzmê ala têkoşînê hîn bi biryartir bilind bikin.
Rûyê din ê şerên emperyalîst, krîzên ekonomîk ên kûr in. Kapîtalîzm li ber hêzên afirêner, bûye astengiya herî mezin. Faşîzm li Tirkiye û Kurdistanê jî polîtîkayên şerê taybet kûr dike. Li dijî karker û kedkaran, gelên bindest, jinan û ciwanan polîtîkaya şerê taybet tê meşandin û hemû amûrên paşverû di dewrê de ne. Li dijî grevên karkeran êrîş tên kirin, zext li ser sendîkayan hene, li dijî tevgerên ciwanan binçavkirin û girtin di dewrê de ne û li dijî zindanan tecrîda şêwazê nû (Zindanên bi tîpa Y û S) di meriyetê de ne. Faşîzm li hundir kiryarên xwe yên faşîst didomîne, li derve jî taşerontiya NATO’yê dike. Ev şert û mercên şênber ên me behs kirî, eniya şoreşê mezin dike, berfireh dike. Sîstema kapîtalîst û amûrên wê yên paşverû, li dijî xwe serhildêran ava bike û bi vî rengî dawiya xwe ya mutlaq amade dike.
Rêya rizgariyê, xeta Şoreşa Cotmehê ye. Îro nûbûna Şoreşa Cotmehê ji her demê vekirîtir e. Weke Tevgera Şoreşa Yekbûyî ya Gelan em bang li karker û gelên bindest ên Tirkiye û Kurdistanê dikin ku li eniya yekbûyî têbikoşin, şer bikin û Cotmehên nû ava bikin. Şoreşa Cotmehê meşaleya hêviyê ya rizgariya mirovahiyê ye. Gihandina vê meşaleyê li pêşerojê, wezîfeya me ya hevpar a dîrokî ye.”
