Hevserokên Giştî yên Partiya Demokrasî û Wekheviyê ya Gelan (DEM Partî) Tulay Hatîmogûllari û Tûncer Bakirhan beşdarî “Kombûna Hevşaredar û Hevserokên Meclîsa Giştî ya Bajaran” bûn ku li Navenda Kongreyê ya ÇandAmed hate lidarxistin.
Li gel Hevserokê Giştî yê Partiya Herêman a Demokratîk (DBP) Keskîn Bayindir gelek kes beşdarî civînê bûn. Axaftina destpêkê jî ji aliyê Bakirhan ve hate ikrin. Bakirhan piştî bîranîna hevşaredar û siyasetmedarên hatin qetilkirin, silav ji siyasetmedarên girtî re şand û xwest, girtiyên siyasî hemû bêne berdan.
Bakirhan got, “Di Pêvajoya Aştî û Civaka Demokratîk de ku 27’ê Sibatê ji aliyê Birêz Ocalan ve hate destpêkirin, wezîfe û berpirsyariyeke mezin dikeve ser milê we jî. Hûn têkoşîna demokrasiya xwecihî dimeşînin. Lewma ev pêvajo rêveberiyên me yên xwecihî jî ji nêz ve eleqedar dike. Ez zanim ku hevalên me wê di vê mijarê bi berpirsyarî tevbigerin, tevkariyê li pêvajoyê bikin û hewl bidin pêvajoyê civakî bikin. Aştî tê wateya rêveberiya xwecihî ya çalak. Aştî tê wateya mezinbûna qada we. Baştî tê wateya tayînnekirina karmendên dewletê li şûna hilbijartiyan. Aştî tê wê wateyê ku banga bajaran bi rengekî wekhev nêzî şaredariyan bibe. Ew nîne ku piştgiriyê bide hin şaredariyan, lê projeyên hin şaredariyan asteng bike. Lewma ev pêvajo we eleqedar dike. Ji ber vê jî em ê tevkariyên xwe pêşkêş bikin û dewam bikin. Em ê şaredariyan weke komun bibînin, bikin navendên çareserkirina pirsgirêkên gel. Me soz dan gel. Li dijî narkotîkê em ê têbikoşin, wê birçîbûn nemîne, dibistana kesî ya ji ber nebûna pereyê ragihandinê nesekine, kesek wê ji ber nebûna hatineyeke şênber dibistanê neterikînin, xwişk û biratî wê bibe. Berpirsyariya hevalên me yên hilbijartî ye ku pêvajoya aştiyê ji nêz ve bişopînin. Beriya her tiştî em dixwazin, divê rêveberiyên xwecihî neyên girtin. Di vê pêvajoyê de berpirsyariya rêveberiyên xwecihî heye, yên ku pêvajoyê bigihînin civakê û bersivê bidin pirsên civakê hûn in. Rêveberên esasî yên pêvajoyê hevalên me yên hevşaredar in. Ez di wê baweriyê de me ku hûn ê vê pêvajoyê bi daxwaz û coşeke mezin pêşwazî bikin.”
Tûncer Bakirhan destnîşan kir ku eger li Tirkiyeyê qala pêvajoyê, demokrasiyê tê kirin divê qeyûm ji holê bê rakirin û got, Divê hevşaredarên me jinûve li karê xwe vegerin. Bendewariya civakê azadiya girtiyan e. Ev yek daxwazeke welê ye ku pêşî li pêvajoyê vedike. Daxwaza me li ber çavan e. Şaredariyên ku qeyûm li ser wan hatiye danîn, careke din radestî îradeya hilbijartî ya gel bê kirin. Îradeya hilbijartî ya gel divê bajêr bi rê ve bibe. Ne tenê li bajarên Kurdan li tevahiya Tirkiyeyê divê êdî em gotina qeyûm nebihîzin.”
‘EM Ê VÊ PÊVAJOYÊ RAST BI RÊ VE BIBIN Û SERKETINEKE MEZIN BI DEST BIXIN’
Hevserokê Giştî yê DEM Partiyê Tûncer Bakirhan anî ziman ku li Rojhilata Navîn bûyerên gelekî cidî diqewimin, cîhaneke nû ava dibe û got, “Li Sûriyeyê, li Rojava em şahidiyê ji pêşketinên dîrokî re dikin. Dibe ku sed salên pêşiya me yên li Rojhilata Navîn niha têne nivîsandin. Lewma em di demeke welê de rêveberiyê dikin ku wê sed salên pêşiya me diyar bike, em di vê demê de bajarên xwe bi rê ve dibin. Di vê demê de dibe ku rîskên mezin hebin, lê belê em dikarin destketiyên mezin jî bi dest bixin. Di destê me de ye ku em rîskan ji holê rakin û serketineke mezin bi dest bixin. Eger em xwedî li nirxan derkevin, karibin xwe bi rêxistin bikin, hêza gel ber bi xwe ve bikişînin, em ê karibin li Rojhilata Navîn bibin xwedî cihekî gelekî girîng. Hêviya min a ji bo vê yekê heye. Em dibînin bê li Bakur û Rojhilatê Sûriyeyê çawa bexçeyê gelan ava dibe. Di vir de rêveberiyên xwecihî gelekî girîng e. Qada me ya rêxistinî rêveberiyên xwecihî ye. Têkoşîna me ji doh bêhtir dijwar e. Lewma em ê vê pêvajoyê bi rengekî rast bi rê ve bibin. Em ê xwe bi rengekî rast bi rêxistin bikin, xizmeteke rast biafirînin û înşalleh em ê serketineke mezin bi dest bixin.”
