Di çarçoveya 25’ê Mijdarê Roja Têkoşîna Navneteweyî ya li dijî Tundiya li Ser Jinan a de, bi pêşengiya TJA’yê û bi beşdariya DEM Partî, DBP û DAD’ê li gundên Azîkan û Kullikreş ên Semsûrê civîn hatin lidarxistin.
Nûnera DAD’ê Hayriye Korkmaz, ku li cemxaneya gundê Azîkan axivî, Seyît Riza û hevalên wî bi bîr anî û bal kişand ser girîngiya axaftina civaka Elewî di pêvajoyên demokratîk de.
Hayriye Korkmaz got, “Bi damezrandina Komarê re, heta îro komkujiyeke Elewiyan a weke wê nehatiye dîtin, pêk hat. Em jî îro weke Elewî, ji bo di civaka demokratîk de xwedî gotin bin, li vir in.”
Hevseroka Giştî ya DBP’ê Çîgdem Kiliçgun Uçar jî destnîşan kir ku Elewî û Kurd ji pêvajoyeke înkarê ya giran re derbas bûne û got, “Xwedîderketina li pêvajoyê, xwedîderketina li bawerî, nasname, edalet û azadiya me ye.”
Çîgdem Kiliçgun Uçar bal kişand ser wê yekê ku têkoşîna jinan ji bo azadiya civakî diyarker e û wiha axivî: “Civakeke ku jin tê de ne azad be, nikare demokratîk be. Em zîhniyeta ku hewl dide sînoran deyne ser jiyana jinên ku siyaseta demokratîk û civakê li ser milên xwe hildigirin, qebûl nakin.”
Ev civînên li Semsûrê, bi nirxandinên li Kullikreşê bi dawî bûn.
Di heman çarçoveyê de Meclisa Jinan a DBP’ê li Qereçoban a Erzîromê bi atolyeya “îdeolojiya rizgariya jinê” bi jinan re hatin gel hev.
