Girtiyên bi navê Keyfo Başak, Hasan Încî û Ahmet Mustafa yên ku li Girtîgeha Ewlehiya Bilind a Tîpa F ya Boluyê dihatin girtin, piştî 31 salan hatin berdan.
Keyfo Başak di 6’ê Çileya 1994’an de li Stenbolê hat binçavkirin û bi sûcdariya “Qanûna Teşkîlata Esasiye ya Komara Tirkiyeyê bi temamî an jî qismekî wê biguherîne“ hat girtin. Hasan Încî bi sûcdariya “endamtiya rêxistinê” li Mersînê hat girtin. Ahmet Mustafa ku ji Bakur û Rojhilatê Sûriyeyê ye di heman salê de hat girtin.
Girtiyên hatin berdan ji aliyê malbat, xizm û endamên Komeleya Marmarayê ya Alîkarî û Hevgirtina bi Malbatên Girtî û Mehkûman re (MATUHAYDER) ve li ber deriyê girtîgehê hatin pêşwazîkirin.
Ji yek girtiyên hat berdan Keyfo Başak diyar kir ku azadî bi tena serê xwe nayê ti wateyê û got, “Bi sedan, bi hezaran hevalên me hîn jî girtî ne. Tevî pêvajoya heyî, polîtîkayên paşxistina berdanê berdewam dikin. Em di nava hewldana derbaskirina vê yekê de ne. Me 32 sal di girtîgehê de derbas kir, di jiyana me ya pêş de jî em ê têkoşînê berdewam bikin. Li ser navê hemû hevalên me yên di girtîgehê de, we silav dikim.”
Hasan Încî jî anî ziman ku gelek girtî hîn jî bi awayekî derhiqûqî di girtîgehê de tên girtin û got, “Divê dengek bilindtir û biryardartir derkeve. Her kes aştiyê dixwaze, lê di nêzîkatiya aştiyê de kêmasî hene. Daxwaziya me ew e ku hemû hevalên me werin berdan. Ez ew ked û fedakariya ku me gihandiye vê rojê û bûne sembolên nirxên me bi rêzdarî û minet bi bîr tînim. Ew nirxên me ne û em ê xwedî li nirxên xwe derkevin. Bila Serok jiyan nabe.”
