13 endamên Partiya Sosyalîst a Bindestan (ESP) li ser îfadeya îtirafkar hatin girtin. Malbatên wan li taxa Gaziyê ya Stenbolê li dijî girtinan daxuyanî dan.
Bi dehan kes li taxa Gaziyê kom bûn û diyar kirin ku ew ê li dijî îtîrafkaran têbikoşin. Li Stenbolê li ser îfadeya tacîzkar û firoşkarê hişbirê Mustafa Bozali di 29’ê Cotmehê de bi ser gelek malan de hate girtin û li ser îfadeya Melîke Akinci 13 kes hatin girtin.
Malbat li ber Qursa Ajokariyê ya Polenê ya li kargeha Akinci kom bûn û pankarta “Îtîrafkarî ketin e, gelê Gaziyê xwedî li rûmeta xwe derkevin” hilgirtin. Endamên ESP, DEM Partî, Partiya Sor, Yekîtiya Têkoşînê, SMF, Partiya Şoreşger, CHP û niştecihên taxê beşdarî daxuyaniyê bûn.
Di daxuyaniyê de timî dirûşmeyên “Gelê Gazî xwedî li rûmeta xwe derkeve” û “Bêdeng nemînin, hûn çiqas bêdeng bimînin, dora wê bê we” hatin berzkirin.
‘LI KÊLEKA 13 HEVALÊN XWE BIN’
Hevseroka ESP’ê ya Sultangaziyê Gamze Toprak destnîşan kir ku armanca êrîşên îtîrafkirinê teslîmgirtina rûmeta gel e û got, “Banga me ji bo gelê e: Werin em li kêleka 13 hevalên xwe yên ku hatine girtin bisekinin. Werin em neçin cihên îtirafkaran û em wan li her derê teşhîr bikin. Werin em wan di nav xwe de nehewînin.”
MALBATA GIRTÎ: DIVÊ MELÎKE ÎFADEYA XWE PAŞVE BIKŞÎNE
Xwişka Mahsunî Yilmaz, Makbûle Yilmaz diyar kir ku Qursa Ajokariyê ya Polenê cihê Melîke Akinci ye û got, “Hemû hevalên me li ser îfadeya Melîke hatin binçavkirin. Em dixwazin ku Melîke îfadeya xwe paşve bikşîne. Ger ew paşve nekşîne, em ê wê li her derê teşhîr bikin û em ê li kêleka hevalên xwe bin.”
