Nexweşê dil Îsmaîl Sever bi îdîaya ku dikare ji endamên Yekîtiya Ciwanên Welatparêz ên Kurdistanê (YCWK) re bibe alîkar, hate girtin. Dadgehê têkildarî vê sûcdariyê delîlek nedît, lê ji ber ku du keçên Sever li nava refên gerîla ne û rojnameya Yenî Yaşamê dixwîne, ji xwe re kir hincet.
Nexweşê dil Îsmaîl Sever di 30’ê Cotmehê de li navçeya Esenyûrt a Stenbolê di serdegirtina malan de hate binçavkirin û pêvajoya wî ya girtinê radixe pêş çavan bê dadgeriya li Tirkiyeyê çawa li gorî desthilatdariyê tevdigere.
Polîsan ku têkildarî Sever ti delîl nedît û tenê li ser texmînê ew binçav kirin, ji ber ku Sever di telefona xwe de kete malperên Yenî Yaşam û ANF’ê û nûçe xwend, ev yek weke sûc nîşan da. Di dosya dozgeriyê de jî cih ji xwendina rojnameya Yenî Yaşamê re hate dayin û weke sûc hate nîşandan.
Dozgeriyê ji bilî malperên nûçeyan her wiha endametiya li Komeleya Piştevanî û Alîkariya bi Malbatên Xizmên Xwe Winda Kirine ya Anatoliyê (ANYAKADER) weke sûc nîşan da.
‘EGER LI NAVA GERÎLA KEÇA TE HEBE TU JÎ ENDAMÊ RÊXISTINÊ YE’
Ji ber ku 2 keçên Îsmaîl Sever tevlî nava refên gerîla bûn, ev yek weke “endametiya rêxistinê” hate şîrovekirin û weke delîl li dosya Sever hate bicihkirin. Her wiha wêneyê keça Sever a li nava refên gerîla şehîd bû ji ber ku di telefona wî de bû, li dosyayê hate bicihkirin. Dozgeriyê bi taybetî bal kişand ser du keçên Sever ên li nava gerîla û hewl da ku dosyayê tijî nîşan bide. Ji bilî vê yekê dozgeriyê wêneyekî bi nîşaneya serketinê weke delîl nîşan da.
Sever ku beriya niha ji ber heman îdîaya “endametiya rêxistinê” girtî hatibû hiştin û hatibû berdan, careke din bi heman îdîayan ji aliyê Dadgeha Cezayê Giran a 13’emîn a Stenbolê ve hate girtin.
‘HIQÛQA DIJMINATIYÊ TÊ MEŞANDIN’
Parêzerê ku bi dosyayê re eleqedar dibe parêzer Veysel Demîrkaya diyar kir ku biryar li gorî hiqûqa ceza ya dijmin hatiye birîn û got, “Krîmînalîzekirina mînakên piştevaniyê yên li nava civakê; derkirina êşên civakê ne ji aliyê hiqûqî ne jî ji aliyê wijdanî ve nayê qebûlkirin.
Muwekîlê me yê 58 salî Îsmaîl Sever bi îdîaya ku tevlî rêxistiniya ciwanan bûye hate girtin. Halbûkî hem ji ber temen, hem jî ji ber rewşa xwe ya tenduristiyê û şêweyê jiyana xwe nikare karekî bi vî rengî bike.”
Parêzer Demîrkaya anî ziman ku Sever bi heman îdîayan ji aliyê dadgeheke din ve hate darizandin, piştre hate berdan û destnîşan kir ku biryara dadgehê li hiqûqê nayê.
