Dewletên Yekbûyî yên Emerîkayê (DYE) di bin navê “Operasyona li dijî narkotîkê” de keştiyên xwe yên şer şandiye Karîbîkê. Trump ji aliyekî ve gefa destwerdanê dixwe, li aliyê din jî rojên dawî işaret bi danûstandinên gengaz ên bi Venezuelayê re kiribû.
Maduro di bernameya heftane de ya li televîzyona dewletê bersiv da nameya keşîşekî Emerîkî û got, “Li DYE’yê kî bixwaze bi Venezuelayê re biaxve, em ê rû bi rû pê re biaxivin. Ti pirsgirêk nîne. Lê belê Venezuela nikare destûrê bide bombekirina xelkê Xiristiyan û qetilkirina wan.”
Maduro bi zimanê Îngilîzî gotinên “Diyalog, diyalog… Belê aştî! Na ji şer re! Ji şer re na!” bi kar anî û diyar kir ku welatê wî timî ji diyalogê re vekiriye.
LI GORÎ MADURO HIN HÊZ TRUMP JI BO ŞER SOR DIKE
Maduro îdîa kir ku li DYE’yê “hin hêz” zorê li Trump dike ku destwerdana leşkerî li Venezuelayê bike. Serokdewletê Venezuelayê îdîa kir ku destwerdaneke bi vî rengî wê bibe “dawiya lîderiya siyasî” ya Trump.
Trump jî hema rojê daxuyaniyek da rojnamevanan û got, “Di demekê de ez ê bi Maduro re biaxivim” û got, lîderê Venezuelayê “Ji bo DYE’yê nebaş e.”
Ji bo pirsa “Hûn şandina leşkeran ber bi Venezuelayê red dikin?” Trump got, “Na, ti rêyan red nakim.”
Dewletên Yekbûyî yên Emerîkayê ji meha Tebaxê û vir ve hejmareke mezin a leşkerên xwe li Karîbîkê bi cih kiriye.
