Festîvala ku 19’ê Mijdarê destpê kir û wê heta 23’ê Mijdarê dewam bike, bi dirûşma “Bîr, Berxwedan û Vîzyon” tê lidarxistin. Di festîvalê de ji kategoriyên fîlmên dirêj û kurt, dokûmanterên dirêj û kurt wê 21 fîlm ji sînemahezan re bê nîşandan.
Festîvalê êvara Çarşemê saet di 18:00 de bi moderatoriya Eda Bektaş û Celîl Kaya li Zeis Kinos a Hambûrgê destpê kir.
Di destpêkê de hunermend Cemîl Qoçgîrî derkete ser dikê û hunera xwe pêşkêş kir. Piştî konserê Derhêner Çayan Demîrel weke mêvanê rûmetê derket ser dikê.
Mêvanê rûmetê Derhêner Çayan Demîrel li gel çepikan derket ser dikê û di wan kêliyan de di navbera beşdarvanan de atmosfereke hestiyariyê rû da. Çayan Demîrel ê xelata mêvanê rûmetê ya jêre hatî dayîn bi gotina; ‘’Ez vê xelatê diyarî gelê Kurd dikim’’ xelat pêşwazî kir.
Di roja yekemîn a festîvalê de fîlmê Derhêner Bêrîvan Binevşa ya bi navê ‘’The Virgin and Child’’ hate nîşandan. Fîlmê 80 deqeyî yê metrajdirêj, rûbirûbûna jina Êzîdî ya bi navê Avesta a ji çeteyên DAÎŞ’ê rizgarbûyî ya li gel endamê DAÎŞ’ê yê ew kiriye koleya xwe û lêgerîna edaletê nîşanî temaşevanên xwe dide. Fîlm, çîroka hesabpirsîn û rûbirûbûna li Kurdistanê dest pê dike û li Brukselê bi dawî dibe, vedibêje.
Belgesela Orkan Bayram a têkildarî têkoşîna Mûharrem Aral ya bi navê ‘’Heval Mûharrem’’ jî wê di 22’yê Mijdarê li Kino 3001 Schanzeyê were nîşandan.
Fîlmê Mûrat Firatoglû ya bi navê ‘’Ji Roja Hemme Miriye Ve’’ jî wê di 21’ê Mijdarê de li li Kino 3001 Schanzeyê were nîşandan. Fîlm, pirsgirêkên aborî û hestî yên Eyubê ku karkeriya cotkariyê dike, nîşan dide. Ji kategoriya metrajdirêjiyê jî belgesela Alî Bagdû ya bi navê ‘’Dengbêjên Me’’ wê 20’ê Mijdarê roja Înê li Kino 3001 Schazeyê were nîşandan. Naveroka belgeselê têkildarî jiyana nûnerên dawîn ên çanda dengbêjiyê ye.
Her wiha belgesela ‘’Bakur’’ ya ji aliyê Çayan Demîrel û Ertûgrûl Mavîoglu ve hatiye kişandin û li Tirkiyeyê hate qedexekirin û belgesela bi navê ‘’38’’ ya Çayan Demîral a têkildarî Komkujiya Dêrsimê ya 38’an jî wê 23’yê Mijdarê roja Yekşemê di festîvalê de werin nîşandan.
