Bi wesîleya 25’ê Mijdarê Roja Têkoşînê ya Navneteweyî ya li dijî Tundiya li Jinan, tundiya li herêmên dagirkirî Efrîn, Serêkaniyê, Girê Spî û Minbicê ya li hemberî jinan careke din kete rojevê.
Ji ber li herêmên dagirkirî derfeta lêkolîneke bi tenduristî tune ye, hejmarên rast jî tam nayên zanîn. Lewma em tenê agahiyên ku gihîştine ber destê saziyên têkoşîna li dijî tundiyê parve dikin.
Li gorî daneyên ku Navenda Lêkolîn û Parastina Mafên Jin belge kirine, ji Mijdara 2024`an heta 1`ê Mijdara 2025’an li Efrîn, Serêkaniyê û Girê Spî 25 jin hatine qetilkirin, 37 jin hatine birîndarkirin û 23 jin jî hatine revandin.
Rêvebera Cîbicîkar a Navenda Lêkolîn û Parastina Mafên Jin Şêrîn Çolî çavdêriyên saziyê yên li herêmên Efrîn, Serêkaniyê û Girê Spî ji ANHA’yê re nirxand û got, “Li van herêman jin rastî her cûr tundiyê tên. Taybet li Efrînê hêjmara jinên ku tên revandin her ku diçe zêde dibe. Jinên tên girtin û di girtîgehan de rastî êşkenceyên herî tund tên. Her wiha li Serêkaniyê û Girê Spî jin tên revandin û çarenûsa wan nayê zanîn.”
Şêrîn Çolî bal kişand ser rewşa jinên Êzidî yên li Efrînê û diyar kir ku çekdarên li wê deverê jinan bi darê zorê baweriyên wan didin guhertin, hîcabê li wan dikin û zorê lê dikin ku navên xwe biguherin û çekdarên wan bi zorê bi xwe re dizewicînin.
Şêrîn Çolî destnîşan kir ku li herêmên Efrîn, Serêkaniyê û Girê Spî ji ber binpêkirinên ku li dijî jinan tê kirin, bi gelek jinan re nexweşiya derûnî çêbûne û ji ber wê jî xwekuştin zêde dibin.
Şêrîn Çolî da zanîn ku ew weke navend van binpêkirinan belge dikin û ji gelek aliyên peywendîdar ên girêdayî hiqûqê û mafê jinan re dişînin û got: “Carnan bersiva me tê dayîn, lê piştî demeke dirêj nû bersiv tê.”
Li gorî agahiyên ku Rêxistina Mafê Mirovan a Efrînê, ji Mijdara 2024`an heta 1`ê Mijdara (2025) belge kirine, li Efrînê 14 jin hatine qetilkirin, 22 birîndar bûne (ji ber tundiyê) û 30 jî hatine revandin (hin ji wan eqûbeta wan ne diyar e).
Li gorî agahiyên Rêxistina Mafê Mirovan a Sûriyeyê ji Çileya 2025`an heta Îlona 2025`an li Cizîrê bi êrişên balafira bê mirov 2 jin hatine qetilkirin, li kantona Firatê bi balafira bê mirov 2 jin û bi topbaranê jinek hatine qetilkirin. Minbicê bi balafira bê mirov, êrişeke çekdarî û teqînan 19 jin hatine kuştin. Li Efrînê bi êrişên çekdarî, xwekuştin 7 jin hatine qetilkirin. Her wiha li Cizîrê 4 jin bi topbaranê, li Firatê 3 jin bi bombebarana balafira bê mirov û topbaranê, li Minbicê 36 jin bi rêya balafira bê mirov û teqînan, li Efrînê 3 jin bi êrişên çekdarî birîndar bûne. Êriş, topbaran û bombebarana bi balafiran ji aliyê dewleta Tirk a dagirker ve ne.
Ji Mijdar-Kanûna 2024`an ji aliyê dewleta Tirk a dagirker û çeteyên girêdayî wê ve, li Efrînê 2 jin bi êrişeke çekdarî birîndar bûne, li Minbicê bi topbaranê 3 jin hatine qetilkirin û 2 jî birîndar bûne, bi êrişeke çekdarî 2 jin hatine kuştin, bi bombebarana balafira bê mirov jinek hatiye qetilkirin û jinek hatiye revandin. Li Kobanê 2 jin bi topbaranê û 2 jinên din bi balafira bê mirov hatine qetilkirin. Li Eyn Îsayê bi bombebarana balafira bê mirov 2 jin hatine qetilkirin.
