Endama Koordînasyona Kongra Star a bajarê Sirînê Mûna Ehmed bi wesîleya 25’ê Mijdarê Roja Têkoşîna Navneteweyî ya li dijî Tundiya li ser Jinê ji ajansa me ANF’ê re axivî û got, “Şoreşa Rojava şoreşa jinê ye; heta jin azad nebe civak jî azad nabe.”
Mûna Ehmed diyar kir ku di nava civakê de li hemberî jinê tundiyek piralî tê meşandin û wiha got, “Tundiya mêran, zexta nav malê, zexta aborî, zewaca di temenê biçûk de û zora psîkolojîk jinan ber bi tarîtiyê ve dibe. Gelek jin di bin vê zextê de ber bi xwekuştinê ve diçin. Wekî rêxistinên jinan, em li dijî her cure tundiyê têdikoş in û ji bo azadiya jinan xebat dimeşînin.”
Mûna Ehmed destnîşan kir ku Şoreşa Rojava li ser bingeha îdeolojiya rizgariya jinan hatiye avakirin û diyar kir ku felsefeya Rêber Apo ya “Civak tenê heke jin azad bin azad e” bingeha vê têkoşînê ye. Mûna Ehmed, bal kişand ser berxwedana jinan a li hemberî DAÎŞ’ê û got ku berxwedana ku jinan di serdema êrîşên DAÎŞ’ê de nîşan daye, îro jî îlham dide têkoşîna jinan a li çaraliyê cîhanê. Mûna Ehmed got, “Jin li dijî zilma rejîmê û hişmendiya serdest a mêran rabûn ser piyan. Divê em îro jî bi heman biryardariyê li ber xwe bidin.”
Mûna Ehmed anî ziman ku hêza rêxistinkirî ya jinan ne tenê di qada leşkerî an siyasî de sînordar e û behsa rola diyarker a jinan di qadên dîplomasî, rêxistinkirina civakî û têkoşînê de kir. Mûna Ehmed, destnîşan kir ku bangên jinan ên ji bo azadiyê li seranserê Rojhilata Navîn, ji Arîn Mîrkan heta Jîna Emînî, deng vedidin û got, “Jinên Rojava îro ji bo hemû jinan bûne çirûska hêviyê. Jinên Durzî, Elewî û yên din ên vê herêmê bang li me dikin; em ê vê têkoşînê bi ruhê Jin, Jiyan û Azadî xurt bikin. Wekî Kongra Star, em ê di her warî de pêşengiya têkoşîna azadiya jinan bikin. Em ê rêya azadiyê ji bo hemû jinan vekin.”
