Li Wanê Tevgera Jinên Azad (TJA), Komeleya Jinên Star, Komîsyona Jinan a Rêveberiyên Herêmî ya DEM Partî, KESK, ÎHAMED, Baroya Wanê, ÎHD, Aryen, Şanowan, Komîsyona Jinan a TMMOB, Xeta Jinê û Kooperatîfa Jinan a Evîn di çarçoveya 25ê Mijdarê de meşek li dar xistin.
Bi sedan jin li pêşiya Wan AVMê heta Qada Bajêr meşiyan û pankarta “Em ji bo bijîn û bidin jiyandin birêxistin dibin” vekirin û dowîzên “Ez jin im jiyan im”, “Di xeta azadiya jinê de heta serketinê têkoşîn”, “Xweparastin hebûn e”, “Li ser şopa Sarayan ber bi şoreşa jinê” û hwd. hatin hilgirtin. Gelek jin tev li çalakiyê bûn.
Piştî meşê jinan li ser Rêya Cûmhûriyetê daxuyaniyek da û metna daxuyaniyê ji hêla Rêvebera KURDÎGEH’ê Evîndar Akbûlût ve hat xwendin. Evîndar Akbûlût anî ziman ku ew kampanyaya xwe ya “Em ji bo bijîn û bidin jiyandin birêxistin dibin” bi dawî dikin. Evîndar Akbûlût destnîşan kir ku ew xwişkên Mirabal, yên ku ji aliyê dîktatoriya Trujîllo ve hatin kuştin û bûne semboleke gerdûnî ya têkoşîna ji bo azadiya jinan, bi bîr tînin û got: “Îro em dengê Rojîn Kabaîş, Nagihan Akarsel, Cîhan Bîlgîn, Îpek Er, Şûle Çet, Hevrîn Xelef û hemû jinên ku bedenê xwe bi axê re kirine yek û bûne bêdawî nin. Dengê me dengê wan e û têkoşîna me berdewamiya jiyana wan e.”
‘TU JIN NE TENÊ YE’
Evîndar Akbûlût diyar kir ku mirinên bi guman ên jinên afirînerên jiyanê tu carî tesaduf nînin. Evîndar Akbûlûtê da zanîn ku serhildana wan ya li dijî mirinên bi guman ên jinan û komkujiyên li ser jinan her roj xurttir dibin û got: “Ev komkujiyên li ser jinan encama newekheviya zayendî, bêcezayî û polîtîkayên şerê taybet û her wiha sîstema olî, mîlîtarîst û serweriya mêran e. Wekî encama van polîtîkayan, em serhildana xwe ya kûr a li dijî zêdebûna kuştinên jinan, li Bakûrê Kurdistanê, li her devera ku em lê amade ne, vediguherînin berxwedanê. Ji aliyê zîhniyeta mêrê desthilatdar ve heta mijdara 2025an li cîhanê 86 hezar jin hatine qetilkirin. Di cîhaneke ku her roj, 140 jin têne qetilkirin, tundî bûye sîstem, laşê jinê dixwazin bikin amûra îstîsmarê.”
‘EM Ê TÊKOŞÎNA XWE BIRÊXISTIN BIKIN’
Evîndar Akbûlût bi lêv kir ku bi parastina jiyana hev, bi mezinkirina hevgirtinê, bi bûyîna hêza li hemberî tundîyê, jin wê vê pergalê biguherînin. Evîndar Akbûlût binê wê xêz kir ku ew dixwazin bijîn û wiha dawî li axaftina xwe anî: Em tu carî bêdeng namînin, tu carî paşdegav ne avêjin. Ev têkoşîn ne tekoşîna îro ye, ya bi salan e . Em bangewaziya xwe dubare dikin. Ji bo pêşîgirtina tundiya li ser jinê em daxwaz dikin ku hemû sazî erkên xwe bi cih bînin, polîtîkaya bêcezabûnê bi dawî bibe, sûcdarên tundiyê neyên parastin, hemû sepanên zagon û îdarî yên ku qadên Azadiyê yên jinê teng dikin bên rakirin. Ji bo Rojîn û ji bo her jina ku hatiye qetilkirin û windakirin, ji bo jiyanên nîvcomayî, ji bo jîn û jiyînê em têkoşîna xwe bi rêxistin dikin.”
‘EM Ê HETA WEKHEVÎ Û AZADIYÊ TÊKOŞÎNÊ BIDOMÎNIN’
Hevberdevka Înîsiyatîfa Yekîtiya Demokratîk Gulcan Kaçmaz Sayyîgît diyar kir ku jinên li çaraliyê cîhanê bi daxwazên wekhev derketine kolanan û got, “Em li cihên kar, li malê û li kolanan ji aliyê kesên herî nêzîkî me ve rastî tunfiyê tên. Heta ku li van axan wekhevî û azadî pêk were em ê têkoşînê bidomînin.”
Meş û daxuyanî, piştî çalakiya rûniştinê ya 5 deqeyan bi dawî bû.
