Bi sedan şêniyên kantona Reqayê, nûnerên saziyên sivîl û leşkerî, Meclisa Kombûna Jinan a Zenûbiya, partiyên siyasî, serokeşîr û rûspî û Meclisa Malbatên Şehîdan berê xwe da konê sersaxiyê ya şehîd Ezîz Şêx Elî yê li taxa Ekrad a bajarê Reqayê.
Şervanê Hêzên Sûriya Demokratîk (QSD) şehîd Ezîz Şêx Elî di 19’ê Mijdarê de di dema pêkanîna erka xwe de li bajarê Hesekê şehîd bûbû.
Di merasîmê de hevserokê Meclisa Malbatên Şehîdan a kantonê Ehmed El Şêx sersaxî da malbata şehîd û soza domandina rêya şehîdan û parastina destkeftiyên wan dubare kir.
Endamê Kongreya Îslama Demokratîk Omer Ziyab bi navê Komeleya Al El Beyt a Reqayê bi ayetekê ji Qurana pîroz li ser mekaneta şehîdan axivî û got ku şehîd ji nifşên bê re dibin nimûneya fedakarî û dilsoziyê.
Hevseroka Desteya Perwerde û Fêrkirinê ya kantonê Zelîxa Ebdî li ser navê Meclisa Rêveber sersaxî da malbat şehîd û soza domandina rêya şehîdan dubare kir.
Merasîm bi dirûşmeyên “Şehîd namirin” bi dawî bû.
