Nivîsgeha Jinan a Partiya Yekitiya Demokratîk (PYD) di salvegera 21’emîn a şehadeta jina têkoşer şehîd Şîlan û 4 hevrêyên wê de, semînerek li hola civînan a bajarê Eyn Îsayê yê kantona Firatê da. Di semînerê de bi dehan endamên saziyan û şênî amade bûn.
Endama Rêveber a Nivîsgeha PYD’ê ya Eyn Îsayê Îman Mihemed li ser jiyana şehîd Şîlan û zarokatiya wê ya li bajarê Kobanê axivî. Îmanê diyar kir ku têkoşîna şehîd Şîlan ji tevlêbûna wê ya li nava tevgera rizgariya Kurdistanê de dest pê kir, dûre hat destgîrkirin, girtin û êşkence lê hate kirin, lê tu carî dev ji têkoşîna xwe heta şehadetê berneda.
Endama Rêveber a Kongra Star Ruqeye Mihemed jî da zanîn ku şehîd ji nifşên din re bûn çira û şehîd Şîlan bi lehengî û berxwedana xwe, wekî nimûneya berxwedana jinan hat îsbatkirin.
Piştre sînevîzyonek li ser jiyana şehîd Şîlan hat pêşandan.
Şehîd Şîlan (Meysa Baqî) di 1971’an de li bajarê Kobanê ji dayik bû û di 1988’an de tevlî tevgera rizgariya Kurdistanê bû. Di 29’ê Mijdara 2004’an de di encama komployekê de li bajarê Mûsilê tevî 4 hevrêyên xwe; Ciwan, Cemîl, Zekeriya û Fuad şehîd bûn.
