Di pîrozbahiyan de hate diyarkirin ku destkeftiyên gelên herêmê encama têkoşîn û berxwedana bi dehan salan e.
QAMIŞLO
Bi boneya 47`emîn slavegera damezrandina PKKˊê (Roja Berxwedana Neteweyî) Înîsiyatîfa Gel a Bajarê Qamişlo li Stadyûma Şehîdên 12`ê Adarê pîrozbahiyek bi rêxistin kir.
Bi sedan welatiyên Kurd, Ereb û Suryan ên bajarê Qamişlo ku di nava wan de koçberên Şehba -Efrîn û Serêkaniyê jî hebûn tevlî şahiyê bûn. Jin, mêr, ciwan, zarok, xwendekar, rewşenbîr û mamoste, nûnerên ji saziyên Rêveberiya Xweser û civaka sivîl di şahiyê de cihê xwe girtin.
Amadebûyên şahiyê dema li qadê kom bûn dirûşmeyên “Ne dawî ye, destpêkeke nû ye”, “Bijî Rêber Apo” berz kirin. Girseya gel li ber stranên şoreşgerî govend gerandin; alên PKK`ê û Koma Civakên Kurdistanê (KCK) û wêneyên Rêber Abdullah Ocalan rakirin.
Bernameya şahiyê bi deqeyeke rêzgirtinê dest pê kir. Piştre Endama Meclisa Malbatên Şehîdan a Bajarê Qamişlo Şemsîxan Gulo axivî, şehîdên şoreşê bi bîr anîn û Rêber Apo silav kir. Şemsîxan Gulo da zanîn ku ew bi saya keda Rêber Apo û şehîdan li hev kom bûne û got: “Çavê hemû cîhanê niha li Îmralî ye. Divê azadiya fizîkî ya Rêber Apo pêk bê. Heta pêkanîna azadiya fizîkî ya Rêber Apo em ê li ser piyan bin. Divê em ranewestin.”
Li ser navê Înîsiyatîfa Gel a Bajarê Qamişlo jî, Endamê Koordînasyona Tevgera Civaka Demokratîk (TEV-DEM) Şêro Şero axivî û 27ˊê Mijdarê li hemû gelên Kurdistanê û cîhanê, bi taybet li Rêber Abdullah Ocalan pîroz kir. Şero got: “Îro rojek ji rojên dîrokê ye, tişta di nava qadên berxwedanê de tê dîtin, şax û berhemên tevgerê ne. Li cîhanê bi giştî şaxên xwe vedaye. Bi keda gerîla, şoreşger û gelê me em îro li vir kom dibin.”
Şahî bi gerandina govenda li ber stranan û bi xwendina helbestan bi dawî bû.
TEBQA
Bi boneya salvegera 47ˊemîn a damezirandina PKKˊê (Roja Berxwedana Neteweyî) xelkê kantona Tebqayê û koçberên Efrîn-Şehbayê, meşeke girseyî li dar xist.
Bi hezaran xelkê kantonê û koçber, nûnerên ji Rêveberiya Xweseriya Demokratîk, deste û meclisên girêdayî wê tevlî meşê bûn.
Meşê ji pêş Kampa Stadyûma Bajarê Wezîşê dest pê kir. Beşdaran wêneyên Rêber Apo û pankartên “Bi xwişk-biratiya gelan em ê Rêber Abdullah Ocalan azad bikin”, “Bi hevgirtina gelan em ê deriyên Îmraliyê bişikînin” hildan.
Meş li pêş avahiya Meclisa Malbatên Şehîdan a li taxa El Sanî (duyem) a bajêr rawestiya. Li wir Hevserokê Meclisa Malbatên Şehîdan a kantonê Mehmûd El Sayil axivî. El Sayil di destpêka axaftina xwe de damezrandina PKKˊê li Rêber Apo û gel pîroz kir û got: “Bi vê boneyê em daxwaza pêkanîna azadiya fizîkî ya Rêber Abdullah Ocalan dikin.”
Li aliyekî din jî li ser navê koçberên Efrîn û Şehbayê Elîf Mihemed axivî. Elîf got: “Rojbûna PKKˊê rojbûna jiyan, mirovahî û demokrasiyê ye û ew destana sedsala 21ˊê ye, serdema azadiya jin-ciwanan û projeya neteweya demokratîk e.”
Meş bi dirûşman bi dawî bû.
TIRBESPIYÊ
Bi sedan şêniyên bajarê Tirbespiyê bi hemû pêkhateyên wê (Kurd, Ereb, Suryan) 27’ê Mijdarê (Roja Berxwedana Neteweyê) li hola Roj a rojhilatê bajar pîroz kir.
Pîrozbahî bi deqeyeke rêzgirtin dest pê kir. Piştre endamê Meclisa bajarê Tirbespiyê Silêman Hisên axivî û bal kişand ser rola PKK’ê di parastina doza Kurd û xurtkirina nirxên jiyana hevbeş di navbera pêkhateyan de.
Hisên di dewama axaftina destnîşan kir ku bi saya hevgirtina gel û têkoşîna wê ya bi pêşengiya Rêber Apo, hemû hewldanên dewleta Tirk a dagirker û pergalên mêtînger ên tunekirina PKK’ê têk çûn.
Piştre Koma Serdem a ji bajarê Hesekê û hunermend Talib El Nasir stran pêşkêş kirin. Girse li ber stranan govend gerandin. Di dawiya şahiyê de helbestvan Ferhad Merdê helbest xwendin.
AMÛDÊ
Şêniyên bajarê Amûdê û koçberên Efrîn û Şehbayê jî Roja Berxwedana Neteweyî li hola Kerem pîroz kir.
Piştî rêzgirtinê, welatparêz Emîn Ebduselam ê ku Rêber Abdullah Ocalan re hevdîtin kiriye axivî. Emîn Ebduselam behsa hevdîtinên bi Rêber Apo re kir û wî bi fîlozofê serdemê bi navê kir.
Di dawiya şahiyê de Koma Tolhildan, Koma Şehîd Delîla, hunermend Lawîn Yûsif û Îbo Can stran gotin. Beşdaran li ser stranan xelekên govendê gerandin.
ÇILAXA
Tevgera Çand û Hunerê ya bajarê Çilaxa jî şahiyek li garaca bajar li dar xist. Li hola geracê wêneyên Rêber Abdullah Ocalan û alên PKK`ê, pankartên “Cejna vejîna gelên Kurdistanê pîroz be” hatin daliqandin.
Şahiya ku girseyeke mezin lê hazir bû, bi deqeyeke rêzgirtin dest pê kir. Piştre hevserokê Meclisa Bajarê Çilaxa Feysel Hesen axivî û got: “Avabûna Partiya Karkerên Kurdistanê (PKK) ji bo gelên ku di bin nîrê qirkirin û asîmîlasyonê de rû bi rû mabû ku gelê Kurd jî di nav de mîladek bû.”
Piştre Koma Serhildan a girêdayê navenda Çand û Hunerê ya Rimêlan û hunermend Waîl Haco û Mihemed El Iwêd stran gotin. Girse li ber stranan xelekên govendê gerandin.
TIL HEMÎSÊ
Meclisa bajarê Til Hemîsê jî bi beşdariya girseyek mezin a şêniyan şahiyek li hola navenda Çandê li dar xist.
Di şahiyê de hevserokê Hêzên Parastina Civakî (HPC) Salih El Xelef Roja Berxwedana Neteweyî pîroz kir û diyar kir ku ev kombûn îfadeya piştevanî û serbilindbûna bi meşa tevgera azadiyê ye.
El Xelef destnîşan kir ku projeya tevgera azadiyê projeya demokrasî, edalet û wekheviyê ye.
Piştre sînevîzyonek li ser avabûna PKK’ê û pêvajoyên tê re derbas bûne û peyama Rêber Apo hat pêşandan.
Şahî bi stran, govend û berzkirina dirûşman bi dawî bû.
