Dema ku li Meclîsê Qanûna Budçeyê ya Navendî ya sala 2026’an dihat nîqaşkirin, Partiya Wekhevî û Demokrasiyê ya Gelan (DEM Partî) bi armanca mezinkirina daxwaza edaletê ya ji bo krîza aborî û xizaniyê, bi dirûşmeya “Ji bo Nan û Aştiyê Budçe” ji 4 baskan ve ber bi Enqereyê meş da destpêkirin.
Welatiyên ku ji baskê Êlihê tevlî meşê bûne, ji ANF’ê re axivîn.
PIRSGIRÊKÊN ABORÎ ZÊDE DIBIN Û DEWAM DIKIN
Huriye Acar anî ziman ku ji ber pirsgirêkên aborî ew di pêvajoyeke zehmet re derbas dibin û got, “Her roj pirsgirêkên aborî zêde dibin û dewam dikin. Daxwaza me ne tenê daxwazên aborî ne. Em dixwazin li vî welatî aştî çêbibe. Bi taybetî bi aştiyê re dê gelek pirsgirêk çareser bibin. Bingehê herî esas ê aştiyê jî azadiya Rêber Apo ye. Êdî em dixwazin wî di nava xwe de bibînin.”
MIROV ÊDÎ NIKARIN DEBARA XWE BIKIN
Ozkan Onal destnîşan kir ku dewlet divê êdî budçeyê nede şer, bide gel û wiha got, “Armanca vê meşê ev e. Mirov êdî nikarin debara xwe bikin. Divê êdî gel neyên mêtingehkirin.”
DAXWAZA NAN Û AŞTIYÊ
Gulcemal Erdinç jî ev tişt got, “Daxwaza me ya nan û aştiyê heye. Em dixwazin ku êdî birçîtî û xizanî bi dawî bibe. Eger aştî çêbibe, dê pirsgirêka debarê jî çareser bibe.”
