Endamê Akademiya Zanistên Civakî ya Abdullah Ocalan Xebat Dîcle, li ser wateya xweparastinê, koka wê ya dîrokî û girîngiya wê ji bo civaka Kurd a îro ji ANF’ê re nirxandin kir.
Dîcle, anî ziman ku xweparastin tenê di aliyê fîzîkî ango çekdarî de girtina dest qels e û got, “Xweparastin çalakiya xwebûnê û parastina hebûna xwe ye. Tiştê ku tê parastin cewher, kesayetî û çanda mirov e.”
Dîcle, her wiha diyar kir ku cewhera civaka Kurd xwedî karekterek dij-kapîtalîst e û got, “Xweparastin parastina civakê li dijî pergala kapîtalîst e. Ferdek ne bi tena serê xwe, bi civaka xwe re heye.”
Dîcle, da xuyakirin ku divê xweparastin bi komunan re pêk were û destnîşan kir ku rêxistinbûn pêwîstiyek bingehîn e û got, “Bê parastin komun nabe. Civakek ku ne rêxistinkirî be nikare xwe biparêze.”
Dîcle, li ser mînakên dîrokî nirxandin kir û berxwedana sedsalan a Kurdan li dijî Asûriyan bi bîr xist û got, “Kurdan xwe parastin û bi rêya eşîr û konfederasyonan li dijî zilmê serketin bi dest xistin.”
Xebat Dîcle, destnîşan kir ku yek ji pirsgirêkên herî mezin ên ku îro civaka Kurd pê re rû bi rû ye, tenê bûne û got ku avahiyên komunê bi bajarvaniyê re qels bûne. Dîcle got, “Heke komun neyên avakirin, civak nikare li ser piyan bimîne.”
Dîcle, bal kişand ser zêdebûna êrîşên li dijî ciwanan bi taybetî jinên ciwan û diyar kir ku ev siyasetek bi zanebûn e û got, “Ciwan giyanê civakê ye. Ger ciwan werin tunekirin, siberoja civakê jî tê tunekirin.”
Dîcle, anî ziman ku têkoşîna rêxistinkirî li dijî madeyên hişber, fihûş û rêbazên şerê taybet pir girîng e û got ku ew xebata ‘Platforma Şiyar Be’ girîng dibînin.
Dîcle, diyar kir ku xebatên rêxistinkirina xweparastin di qada civakî de dest pê kirine û wiha domand, “Divê em kolanên xwe birêxistin bikin. Divê mirov li mala xwe çawa di ewlehiyê de dijî, bi heman hestan li kolanan jî bijîn.”
Xebat Dîcle, bal kişand ser bûyera Rojîn Kabaiş û diyar kir ku tiştê qewimî careke din girîngiya xweparastinê nîşan dide. Dîcle got, “Me nekarî Rojîn rizgar bikin, lê eşkerekirina rastiyê jî hewldanek xweparastinê ye.”
