Li gorî anketên li nava raya giştî, ji dema bidawîbûna dîktatoriya Augosto Pinochet a beriya 35 salan û vir ve yekemcar namzetekî rastgiriya tund favorî ye.
Di anketan de tê ragihandin ku parêzerê 59 salî José Antonio Kast bi dengekî zêde li pêş xuya dike. Kast li hemberî Jeannette Jara di pêşbirkê de ye ku Jara koalîsyoneke berfireh a çep temsîl dike û weke “komunîst a nerm” tê pênasekirin.
Bavê neh zarokan Kast ku baweriya xwe ya Katolîk bi eşkere destnîşan dike, kampanya xwe li ser rêjeya zêde ya sûc da rûniştandin. Kast soz da ku li hemberî hebûna çeteyên alîgiriya tundiyê tedbîrên hişk werbigire û dibêje, piraniya wan ji koçberên ji Venezuelayê reviyane wê 340 hezar koçberî dersînor bike.
Hevrika wî Jeannette Jara wezîra berê ya Kar e.
Jara soza zêdekirina mûçeyê kêmtirîn, parastina mafên teqawîtan û xurtkirina polîtîkayên civakî dide.
Di tûra destpêkê ya hilbijartinê de ku 16’ê Mijdarê pêk hat, herdu namzetan nêzî yek ji çar parên dengan wergirtin. Namzeta çep Jara bi ferqeke cuda li pêş bû, lê belê rêjeya dengê giştî yê partiyên rastgir gihîşt ji sedî 70’yî.
Di hilbijartinê de ku dengdan mecbûrî ye, zêdeyî 15.6 milyon hilbijêr wê dengê xwe bidin. Sindoqên dengdanê bi dema herêmî wê saet di 08:00 de bêne vekirin û saet di 18:00 jî bêne girtin.
