Zarokê 12 salî Nîhat Kazanhan di 14’ê Çileya 2015’an de li navçeya Cizîrê ya Şirnexê ji hêla polîsê tîmên taybet Mehmet Nûrbakî Goçmez ve hatibû qetilkirin. Bi ser qetilkirina Kazanhan re 12 sal derbas bûn û ji bo girtina polîsê kujer bultena sor hate derxistin, lê tevî vê jî ev 2 sal û 7 meh in hêj jî kujer nehatiye girtin.
Îro rûniştina 14’emîn a doza ji nûve darizandina bersûc hat lidar xistin. Di rûniştina ku li Dadgeha Cezayê ya Giran a 1’emîn a Cizîrê pêk hat de malbata Kazanhan û parêzerên wan amade bûn.
Kesê bi navê Serkan Kizildemîr ku di rûniştina din de hatibû tesbîtkirin ku bersûc Goçmez telefona wî bikar aniye û biryara guhdarîkirina wî hatibû dayîn, tevlî rûniştinê nebû.
Di doza ku di şande dadwerî de guhertin çêbû, hate gotin ku bersûc Mehmet Nurî Goçmez, ku bi bultena sor lê tê gerîn, nehatiye girtin. Her wiha hate diyarkirin ku biryara dadgehê ya bi zorê anîna şahid ji aliyê midûriyeta polîsan ve nehatiye pêkanîn.
Di rûniştinê de, bavê Kazanhan Mehmet Emîn Kazanhan, daxwaza girtina bersûc kir, parêzerê malbatê Osman Cîngoz jî daxwaza girtina bersûc û cezakirina wî kir. Dozger jî daxwaz kir ku kêmahiyên di dosyayê de werin temamkirin û li benda cîbicîkirina biryara girtina bersûc bin.
Rûniştin taloqî 13’yê Adara 2026’an hat kirin.
