Li Hewdariya Reş Kake ya Kerkûkê ji bo gerîlayê HPG’ê Çiyager Amed (Osman Ebdurehman) ê ku di 28’ê Tebaxa 2018’an de li Herêma Garê şehîd bûbû, merasîma sersaxiyê hate lidarxistin.
Di merasîma sersaxiyê de birayê şehîd Çiyager Amed, Berzan Ebdurehman, axivî û got: “Şehîd Osman şehîdê gel û welatê xwe ye û xwe ji bo axa Kurdistanê ya Mezin feda kir. Şikir ji Xwedê re, birayê me di rêya şoreşê de şehîd bû. Bêguman em bi şehadeta birayê xwe serbilind in. Bi taybetî jî ji ber ku ji bo Kurdistana mezin şehîd bû, em ê her tim pê serbilind bin.”
Berzan Ebdurehman derbarê tevlêbûn û şehadeta birayê xwe de wiha got: “Birayê min şehîd Çiyager Amed di 20’ê Cotmeha 2016’an de tevlî nava refên gerîla bû. Me duh xebera şehadeta wî girt. Em gelekî serbilind û şanaz in ku birayê me ji bo Kurdistanê şehîd bû.”
Xalê şehîd Çiyager Amed, Dilşad Ebdullah jî hestên xwe yên derbarê şehadeta biraziyê xwe de bi van gotinan anî ziman: “Em bi şehîdê xwe û şehîdên azadiyê serbilind in. Em bawer dikin ku têkoşîna şehîd Çiyager têkoşîneke Kurdî ya bedew û pîroz e. Şehîd ji bo her Kurdekî çavkaniya serbilindiyê ye. Ez dikarim bi hêsanî bibêjim ku di navbera çar parçeyên Kurdistanê de; Rojava, Rojhilat, Bakur û Başûr ti cudahî nîn e.”
Xalê şehîd diyar kir ku ew hêvî dike her Kurdek bigihêje Kurdistaneke ku xeyala wê dike û got: “Ez, malbata min û xizmên min, bi şehîd Çiyager serbilind in ku di vê rêya azadiyê de şehîd bû.”
Çavkanî: Rojnews
