Ji destpêka Şoreşa Rojavayê Kurdistanê û heta roja me ya îro, dewleta Tirk a dagirker bi hemû rê û rêbazan êrîşê bir ser Bakur û Rojhilatê Sûriyeyê, rojnemevan di nava derfetên kêm de, bi kamereya xwe ev yek eşkere kirin.
Nazim Daştan û Cîhan Bîlgîn jî di destpêka pêlên êrîşê yên li ser Bakur û Rojhilatê Sûriyeyê de, bi kamereya xwe di çeperên herî pêş de, ji bo nîşandana berxwedaniya şervanan û ji bo eşkerekirina hovîtiya dewleta Tirk a dagier, dibûn şahidê berxwedaniyeke efsanewî. Nazim û Cîhan di nava zor û zehmetiyan de jî, hewil dan ku rûyê dewleta Tirk a faşîst ji raya giştî re eşkere bikin. Êrîşên wan çeteyên ku bi roj û şev bêyî navber dewam dikirin, bi kamereya xwe tomar dikirin û ji raya giştî re radigihandin.
Di 19’ê Kanûnê de Cîhan Bîlgîn û Nazim Daştan bi êrîşa balafira dewleta Tirk a dagirker a bê mirov, şehîd bûn. Bi hedefgirtina rojnamevanan re dewleta Tirk hewil dide rûyê xwe yê faşîst binixumîne. Hevreyên rojnamevan Nazim û Cîhan ji ANF’ê re gotin ku ew ê heta dawiyê xwedî li kamereya wan derkevin û ew ê heqîqeta heyî ji raya giştî re rabigihînin.
‘EW BÛN MAMOSTEYÊ YEKEMÎN DI RIYA XEBATÊ DE’
Nûçegîhana Ronahî TV Hêvîdar Heranî têkildarî şehadeta her du hevreyên xwe axivî û qala bîranînên xwe û Cîhan Bîlgîn kir û got: “Em bi rêzdarî bejna xwe li ber wan ditewînin. Li her bajarekî Rojavayê Kurdistanê şop û keda her du hevreyên me hebûn. Ew bi xwe şopên lehengtiyê bû. Min di sala 2017`an de Cîhan Bîlgîn û Nazim Daştan nas kir, Cîhan xwedî wê taybetmendiyê bû ku kenê li ser rûyê wê dibû çavkaniya îlham û moralê. Ew ji bo min bûn mamosteyên yekemîn di jiyanê de û di riya xebatê de. Wê em fêrî hezkirina kar û jiyanê kir. Dema ku Cîhan li cihekî ba, bi taybet di dema vegera ji kar de, di dengê kenê wê de mirovan dizanîn ku ew ketiyê hundir. Ew hemû hevalan dixist tevgerê.”
‘BÊHNA NAZIM Û CÎHANAN JI BENDAVA TIŞRÎNÊ DIHAT’
Hêvîdar wiha axaftina xwe dewam kir: “Çend sal jî derbas bibin, wê bîranîna wan di nava mejiyê me de bimîne û çax bide. Li ser bendava Tişrînê jî bêhna Nazim û Cîhanan dihat, bêhna berxwedaniya wan dihat. Em soz didin ku çend sal derbas bibin jî, em ê xwedî li mîrateya wan û kamereya wan derbikevin.”
Nûçegîhana Rojava TV Êvana Misto jî ji bo domandina xeta Nazim û Cîhanan wiha got: “Em her du hevreyên xwe bi bîr tînin, ew şehîdên heqîqetê ne. Her du jî kêlî bi kêlî berxwedaniya li Pira Qereqozax û li Bendava Tişrînê ragihandin, ew bûn çavkaniya rastî û heqîqeta heyî. Em tu carî wan ji bîr nakin. Ruxmî ku her tim di bin êrîşa dewleta Tirk a dagirker de bûn jî lê dîsa jî bi kamereya xwe bersiv didan wê yekê û li hemberî wê jî bi kamereya xwe li ber xwe dan. “
‘PÊNÛS Û KAMEREYA WAN HÎŞT KU BENDAVA TIŞRÎN Û PIRA QEREQOZAXÊ BI SER BIKEVE’
Êvana Misot got ku ew bi saya wan li vir jiyan dikin û wiha axaftina xwe bi dawî kir: “Kamereya wan û pênûsa wan hişt ku bendava Tişrînê û pira Qereqozaxê bi ser bikeve. Lewra em ê heta dawiyê li ser xeta wan bin û em ê bi wê re serkeftinê mîsoger bikin.”
