Kampanyaya Sêşemên ji Darvekirinê re Na di hefteya 100’emîn de berdewame. Bi vê wesîleyê kampanyayê daxuyaniyek weşand û behsa giringiya kampanyayê kir.
Di daxuyaniyê de hatiye gotin: “Niha ji 55 girtîgehên li Rojhilatê Kurdistan û Îranê girtî tevlî kampanyayê bûne. Ev nîşaneya yekrêzî û karîna derbaskirina astengiyên ewlehiyê yên tund e. Ev kampanya bûye şoreşek girseyî ku kariye sînorên coxrafî û astengiyên li girtîgehan derbas bike û bibe bersivek ji bo şert û mercên taybet û cezayên darvekirinê.”
Di derbarê armanca Kampanyaya Sêşemên ji Darvekirinê re Na de jî hatiye gotin: “Kampanya îşaret bi derencamên mirovî û yasayî, cezayên darvekirinê dike. Rexne li sîstema tundutijiyê ya desthilatê digre û parastinê li mafên seretayî yên jiyanê dike. Ev jî nîşan dide ku çawan kiryarên girtiyan dikare bibe yek ji bandortirîn şêwazên derketina li dijî sîstema tawanbar a hikûmetê.”
Di dawiya daxuyaniyê de jî hatiye gotin: “Beşdarvanên kampanyayê di hefteya 100’emîn de çalakiyên greva birçîbûnê û nerazîbûna li dijî cezayê darvekirinê berdewam dikin. Yekgirtina welatiyan, rêxistinên mafên mirov û saziyên çapemeniyê dikarin pêngavên bibandor ji bo kêmkirina tundutijiyê bavêjin.”
Hêjayî gotinê ye Kampanyaya Sêşemên ji Darvekirinê re Na di 9’ê Çileya 2023’yan de wek nerazîbûnek li dijî darvekirinên li Rojhilatê Kurdistan û Îranê hat destpêkirin. Hemû rojên sêşeman beşdarvanên kampanyayê dikevin greva birçîbûnê.
