Fermandarê Giştî yê Hêzên Sûriyeya Demokratîk (QSD) Mazlûm Ebdî di civîna Desteya Piştevaniyê de ku ji bo piştgiriya bi Komîtya Muzakereyê ya li Bakur û Rojhilatê Sûriyeyê hate avakirin, axivî. Mazlûm Ebdî li ser hevîtinên navbera Rêveberiya Xweser û rêveberiya Şamê nirxandin kir.
Ebdî bal kişand ser sernavê entegrasyona leşekrî û diyar kir ku di mijara nêzîkatiyeke li ser esasê berjewendiyên cemaweriyê de alî gihîştin feraset û nêrîneke hevpar û got, “Di mijara entegrasyona hêzên leşkerî de ji bo berjewendiyên cemaweriyê alî gihîştin nêrîneke hevpar.”
Ebdî destnîşan kir ku bidestxistina çareseriyeke mayinde ji bo tevahiya Sûriyeyê pêwendiya xwe yekser bi meseleyên destûra bingehînî heye û got, “Ji bo xwegihandina li çareseriyeke mayinde ya ji bo temamiya Sûriyeyê pêwîstî bi demê û mijarên destûra bingehînî yên bi muzakereyên berfireh heye. Em di wê baweriyê de ne ku çareseriya li Sûriyeyê li ser bingeha modeleke rêveberiyê ya hevseng, tevgir û dûrî avaniyên navendîperestiya tund dibe. Lewma şêweyê hikumetê û tevlîbûna çalak a pêkhateyan hemûyan li vê pêvajoyê, hêmanên bingehîn ên çareseriyê ne. Ji bo avakirina destûra bingehîn a ku bersivê dide bendewariyên hemû derdoran, pêwîstî bi diyalogeke çêker û kûr heye.”
Ebdî ragihand ku di mijara sînor û rêvebirina sînor de pêşketin çêbûye û got, “Di mijara derbasbûna sînor û rêvebirina sînor de ji aliyê avakirina vîzyoneke hevpar pêşketin çêdibin. Feraseteke şênber heye ku destnîşan dike ku çavkaniyên xwezayî ne yê aliyekî ye, lê milkê tevahiya Sûriyeyiyan e. Di gelek sernavan de nêrîna hevpar pêk hatiye û em hêvî dikin ku di dema pêş de li ser hemû mijaran lihevkirin pêk were. Di vê çarçoveyê de em dixwazin gelê herêmê herêmên xwe di çarçoveyeke destûra bingehîn de bi rêbaza mekanîzmayên rewa û demokratîk bi rê ve bibin.”
