Konseya Reveberiya Kongreya Neteweyî ya Kurdistanê (KNK) têkildarî êrişên komên çeteyên girêdayî dewleta Tirk ên di nava hikûmeta veguhêz de yên li ser taxên Şêxmeqsûd û Eşrefiyê daxuyaniyeke nivîskî da û bi tundî êrîş şermezar kir.
Naveroka daxuyaniyê bi vî rengî ye:
‘’Ev sê roj in li Halebê û derdora wê, li ser deverên Kurdan êrîş pêk tên. Dema ku heyeta QSD’ê ji bo hevdîtînên çareseriyê çû Şamê, hinek hêz li Halebê ketin nava liv û tevgerê û êrîşî deverên Kurdan kirin. Ev biryar ev êrîş ne tesedûf in û ji bo têkbirina hevdîtinan in. Ev biryar li Tirkiyeyê hatiye standin û bi destê hêzên girêdayî Tirkiyeyê tên kirin. Armanca van êrîşan ew e ku çareseriyeke aştiyane pêk neyê û Kurd li Sûriyeyê nebin xwedî statû.
Dema ku di navbera Rêveberiya Xweser û desthilata Şamê da hevdîtin pêk tên û alî nîzikê hev dibin, ev êrîş tên dubarekirin. Vê carê jî tam dema her kes hêviya li hevhatinekî bû, dîsa hêzên li dijî aştî û çareseriyê dest bi tevgerê kirin û şer derxistin. Jixwe van rojan rayedarên dewleta Tirk yek bi yek derdikevin û gefan li Kurdên Rojvaya Kurdistanê dixwin. Li vê derê eşkere ye yên ku Suriyeyê tevlîhev dikin, devleta Tirk û hêzên girêdayî wê ne. Pêwîst e raya giştî û hêzên peywendîdar vê rastiyê bibînin û gorî vê rastiyê jî tedbîran bigirin.
Li Helebê taxên Şêxmeqsûd û Eşrefiyê ku du taxên Kurdnişîn in, bi tangan û bi hemû çekên giran hatine dorpêçkirin û êrîş berdewam in. Di van êrîşan de jin, zarok jî di nav de hemû niştecî û dibistan, nexweşxane û avahî tên hedefgirtin. Di êrîşan de jin û zarok jî di nav de heta niha derorê deh kesan jiyana xwe ji dest dane û dehan jî birîndar hene. Li van taxan elektrîk û av hatine qutkirin û derbaskirina pêdiviyên weke derman û xwarinê jî hatiye astengkirin. Li Helebê li deverên Kurdan krîzeke mirovahiyê heye.
Pêwîst e pêşiya her kesî rêveberiya Şamê xwedî li erkên xwe derkeve, van hêzan kontrol bike û gorî peymanê tev bigere. Girêdayî vê yekê em bang li Rêxistina Neteweyên Yekbûyî û hemî hêzên peywendîdar dikin ku ji rewşê re çavên xwe negirin û zûtirin demê de bikevin nava tevgerê û van êrîşan bidin rawestandin. Di heman demê de em bang li raya giştî ya cihanê û dostên gelê Kurd dikin ku Kurdên Rojava bi tenê nehêlin û piştgiriya gelê Kurd bikin. Her wiha em bang li hemû hêzên Kurdistanê û hemû Kurdistaniyan dikin û dibêjin bi ruhê berxwedana Kobanê li destkeftiyên Rojava xwedî derkevin û cihê xwe li gel Rêveberiya Xweser bigirin.
Bi vê munasebetê em weke KNK, êrîşên li ser gelê Kurd yên li wan deveran bi tundî şermezar dikin û dibêjin ku em bi hemû awayî li gel Rêveberiya Xweser in û em ê deskkeftiyên Kurdan biparêzin. Her wiha em ji kesên jiyana xwe ji destdayî re rehmetê, ji malbat û ji hemû gelê Kurdistanê re sersaxiyê û ji birîndaran re şifayê dixwazin.
Xwedîderketina Rojava, xwedîderketina Kurdistanê ye.’’
