Parlamentera DEM Partiyê Ayten Kordû di 13’emîn salvegera Komkujiya Parîsê de ji ANF’ê re axivî. Ayten Kordû bi bîr xist ku ji bo aşitiyeke mayînde û birûmet rûbirûbûn şert e û anî ziman ku yek ji xala herî girîng ya vê yekê eşkerekirina Komkujiya Parîsê ye.
‘EV 13 SAL IN BERPIRSIYARÊN KOMKUJIYÊ NEHATINE EŞKEREKIRIN!’
Ayten Kordû di destpêka axaftina xwe de diyar kir ku di ser qetilkirina yek ji damezrînera PKK’ê Sakîne Cansiz (Sara), Nûnera Parîsê ya Kongreya Neteweyî ya Kurdistanê (KNK) Fîdan Dogan (Rojbîn) û endama Tevgera Ciwanên Kurd Leyla Şaylemez (Ronahî) ya di 9’ê Çileya 2013’an a li Buroya Enformasyona Kurdistanê ya Parîsê de 13 sal derbas bûne lê belê rola aktorên li Tirkiyeyê û navneteweyî ya di vê komkujiyê de nehatiye eşkerekirin.
Ayten Kordû bi bîr xist ku Sakîne Cansiz, Fîdan Dogan û Leyla Şaylemez di sala 2013’yan de di dema pêkhatina aşitiyê de hatin qetilkirin û ji ber wê yekê nabe ku qetilkirina her sê jinên Kurd ji vê pêvajoyê cuda bê dîtin.
‘KOMKUJIYA PARÎSÊ RÛDANA NAVNETEWEYÎ YA TUNDIYA DEWLETA MÊR E!’
Ayten Kordu piştre anî ziman ku Komkujiya Parîsê, rûdana navneteweyî ya tundiya dewlata mêr e û got: ‘’Sakîne û hevalên wê li dijî vê zîhniyet û rejîma yekperest mîrateyeke têkoşînê ya girîng hiştin. Her civak di nava xwe de pêşengên xwe diafirîne. Weke Xwişkên Mirabel, Rosa Luxemburg, Clara Zetkin, Leyla Qasim, Zarîfe û Besêyan, gelê Kurd jî ji hembêza xwe Sakîne derxist. Sakîne Cansiz, li gel têkoşîna xwe ya di nava tevgera jinên Kurd de ji hemû jinan re bû pêşeng. Em jin, heya ku berpirsên rastîn ên Komkujiya Parîsê neyên eşkerekirin em ê têkoşîna xwe bidomînin.’’
‘RÛBIRÛBÛN ŞERT E!’
Ayten Kordû di dewama axaftina xwe de diyar kir ku li Tirkiyeyê ji bo aşitiya mayînde rûbirûbûn şert e û yek ji xala herî girîng ya vê yekê eşkerekirina Komkujiya Parîsê ye. Ayten Kordû anî ziman ku lê belê li Tirkiyeyê dewlet û desthilatdarî pêngavên demokratîk ên têkildarî meseleya Kurd ku divê biavêje, naavêje û got: ‘’Bi rastî jî girîngtirîn perçeyê rûbirîbûna li gel heqîqetan, eşkerekirina kujerên li pişt qetilkirina Sakîne Cansiz û hevalên wê ye.’’
ÊRÎŞÊN LI HELEBÊ…
Parlamenter Ayten Kordû bal kişand ser êrîşên li ser taxên li Helebê û diyar kir ku ev êrîş ne tasadûf in û ev yek anîn ziman: ‘’Rêveberiyeke ku bi zîhniyeta DAÎŞ’ê hatiye avakirin, li dijî gelên li wir ên pirçandî weke gefeke rastîn e û bûyerên li wir wê bandorê li her derê bikin. Qetilkirina sivîlan, bombebarankirina nexweşxaneyan û revandina jin û ciwanan dîsa perçeyekî zîhniyeta DAÎŞ’ê ne. Divê li hemberî vê yekê bêdeng nemînin. Di serî de jî divê desthilatdariya li Tirkiyeyê li Sûriyeyê bi vê berpirsiyariyê tev bigere û li şûna roleke wêranker divê ji bo pêkhatina aşitiya li wir hewl bide. Êrîşa li ser Rojava tê wateya êrîşa li ser xwişk-biratiya gelên li wir. Em vê yekê tu caran qebûl nakin û bi awayekî eşkere tînin ziman ku Rojava ne bi tenê ye. Tekane şensê Sûriyeyê, avakirina jiyaneke demokratîk e.’’
