Dînemên ji Taxa Şêxmeqsûdê hatine, drama mirovî ya li Helebê nîşan didin. Li Nexweşxaneya Xalid Fecir a bi çekên giran hatiye hedefgirtin, jin, zarok û birîndar bi mirinê re rû bi rû hatine hiştin û gel û xebatkarên tenduristiyê bi derfetên gelekî sînordar hewl didin mudaxele bikin.
ÊRÎŞ DI ROJA 5’AN DE NE
Êrîşên komên çeteyên girêdayî Hikûmeta Veguhêz a Sûriyeyê û dewleta Tirk piştgiriyê dide wan, yên li ser taxên Şêxmeqsûd û Eşrefiyê yên Helebê ketin roja xwe ya 5’an. Nexweşxaneya Xalid Fecir ku yek ji girîngtirîn hedefa êrîşan e, di nava şer û pevûçanan de ye.
Li gorî agahiyên ku ji qadê hatine, nexweşxane bi dehan caran bi çekên giran hatiye hedefgirtin, ceyran qut bûye û xizmetên tenduristiyê bi temamî sekinîne. Di dîmenan de tê dîtin ku jin, zarok, temenmezin û gelek birîndarên li nexweşxaneyê bi rîska mirinê re rû bi rû ne.
MALZEMEYÊN TENDURISTIYÊ GELEKÎ KÊM IN
Li nexweşxaneya ku xebatkarên tenduristiyê bi derfetên gelekî sînordar dixebitin, malzemeyên tibbî gelekî kêm in û kêmasiya personelan gelekî zêde ye. Tê îfadekirin ku tedawiya gelek birîndaran di wextê wê de nayê kirin û ev yek jî rê li ber talûkeya zêdebûna mirinan vedike.
Tê ragihandin ku êrîş bi nexweşxaneyê re sînordar nînin û xanî, kolan û binesaziya li taxên Şêxmeqsûd û Eşrefiyê bi dijwarî tên bombebarankirin. Dîmenên ji herêmê hatine û şahid diyar dikin ku tiştên ku rû didin veguherîne krîzeke mirovî ya gelekî giran.
