Jinên ji Kantona Firatê li dijî êrîşên li ser her du taxên Kurdan Şêxmeqsûd û Eşrefiyê yên li Helebê daketin qadan û jinan armancgirtina jinan û bi taybet jî ew şehîda ku çeteyan li ser banî xist xwarê ptotesto kirin. Jinên ku tevlî meşê bûn ji ANF`ê re axivîn û gotin ku ew çete û desthilatdariyên faşîst jî hêz û îradeya jinan ditirsin.
Jina bi navê Semîre Ehmed diyar kir ku dewletên desthilatdar ji hêza jinan ditirsin û ev yek anîn ziman: ‘’Weke jinên ji Kobanê em ê heta dawiyê xwedî li mîrasa şehdîdan derkevin. Ew ji îrade û hêza jinên Kurd ditirsin. Careke din desthilatdariyê xwest ku ew îradeya jinan a li Kobanê pêş ket, tune bike. Lê belê li Kobanê ew ruh û jinên Kurd bi ser ketin. A niha jî heman berxwedan li her du taxan pêk tê ku ew berxwedaneke efsanewî ye û bi pêşengtiya jinan pêk tê. Ji wan jinan ditirsin ku ji ber wê jî cenazeyê jina şehîd ji banî avêtin erdê. Dema ku jin dibêjin `Berxwedan jiyan e` hemû desthilatdarî têk diçin û ditirsin.’’
Semîre Ehmed di dewama axaftina xwe de destnîşan kir ku heta yek ji wan dimîne ew ê berxwedana wan şervanan bidomînin û got: ‘’Weke dayîk em jî şopdarên wan in û em soz didin wan ku em ê berxwedana wan bidomîn in. Weke jina Kurd heta dawiyê jî em ê li qadan bin, ev ax axa me ye û warê me ye. Çawa ku DAÎŞ li Kobanê têk çû, wê li taxên Şêxmeqsûd û Eşrefiyê jî têk biçin û hêza jinan wê ser bikeve. Ger dayîka şehîdan tenê bimîne wê bi hezaran rabin ser piyan.’’
Dayîka bi navê Zehîde Mihemed jî êrîşên li ser gelê Kurd şermezar kirin û ev yek anîn ziman: ‘’Em van êrîşan qebûl nakin. Ehmed El Şeri bi xwe fermandarê çeteyan bû û di nava seetan de bû serokê Sûriyeyê. Me ked da û me Sûriyeya xwe parast. Ew zarokan qetil dikin, ev kiryar tenê li serê Kurdan tên kirin, hemû dewletan ji bo berjewendiyên xwe xwe bêdeng kirine. Divê êdî hemû dewlet demildest li hemberî van çeteyan berteka hewce nîşan bidin. Mafê me jî heye, em xwedî maf in, em ê mafê xwe biparêzin û çi dibe bila bibe, em ê heta dawiyê jî li ber xwe bidin û ser bikevin.”
