Koçberên li dibistanên li bajarê Kobanê hatine bicihkirin, di salvegera rizgarkirina Kobanê de li ser zor û zehmetiyên ku ew dikişînin ji ANHA’yê re axivîn.
Şêx Mihemed da zanîn ku ew ê bi hemû hêza xwe li ber xwe bidin û dijmin têk bibin û wiha got: “Îro salvegera 11`emîn a rizgarkirina bajarê Kobanê ji çeteyên DAIŞ`ê ye. Çawa ku em bi hemû hêza xwe li hember êrişên çeteyên DAIŞ`ê sekinîn û me şer kir, me vê carê jî têk birin, em careke din hemû dijminên gelê Kurd têk bibin û Kobanê ji êrişên hemû çeteyan biparêzin.”
Şêx Mihemed anî ziman ku gel di nava gelek zehmetiyan re derbas dibe û wiha got: “Kobanê dorpêçkirî ye û av, xwarin, vexwarin û înternet tune ye. Tevî hemû zehmetiyan em dest ji berxwedanê bernadin. Heta dilopek xwîn di canê me de hebe, em ê Ii ber xwe bidin.”
Eyşe Ebo diyar kir ku ew dixwazin vegerin cih û warên xwe û wiha got: “Em dixwazin hemû gelê Kurd ê Kurdistanê destê xwe di destê hev ke û ji bo bajarê Kobanê rabe ser pêyan. Bila her kes çavên xwe ji bo Kobanê û zehmetiyên ku gel di Kobanê de dikişîne veke.”
Eyşeyê da zanîn ku ew her tim êşa koçberiyê dikêşin, êdî divê tu kes li hember êrişên dijminan û qetlîaman xwe bê deng neke.
Mihemed Ismaîl got ew ê her tim li ber xwe bidin û wiha anî ziman: “Em ê her tim li pişt şervanên xwe bin û li ber xwe bidin. Em koçber bûne, em gelek zehmetiyên jiyanî dikêşin. Lê tevî hemû zehmetiyan, em ê li ber xwe bidin û ji axa Kobanê dernakevin.”
