Komeleya Jinên Iraqî têkildarî êrîş û dagirkeriya dewleta Tirk û çeteyên Colanî yên li ser Rojavayê Kurdistanê bi taybetî jî êrîşên li ser jinan daxuyaniyek nivîskî parve kir.
Di daxuyaniyê de hate diyarkirin ku deverên Rojavayê Kurdistanê di qonaxek zehmet re derbas dibin û got: “Ji ber destwerdan û bertekên herêmî û navdewletî rewş aloztir bûye. Ev rewş bandorek nerênî li ser rewşa civakî, mirovî, aborî û xizmetguzariyên sereke kiriye. Rewşa jinan jî her ku diçe zehmetir dibe. Ji bilî wê jî jinên Rojava li herêmên bi aloz û di dema koçberiyê de rûbirûyê zehmetiyên mezin dibin.”
Komeleya Jinên Iraqî êrîş û binpêkirinên ku li beramberî jinên Rojavayê Kurdistanê tên kirin şermezar kir û got: “Em dilsoziya xwe ya bi jinên Rojava re tînin ziman. Em daxwaz dikin ku gavên bilez ji bo rûbirûbûna van astengiyan bên avêtin.”
