Serokê Amerîkayê Donald Trump diyar kir ku eger Nûrî el-Malîkî, ku berê serokwezîr bû û nêzîkî komên Şîî yên girêdayî Tehranê ye, dîsa ji aliyê wan ve were hilbijartin, DYA êdî piştgiriyê nede Iraqê.
Trump li ser platforma Truth Social wiha got: “Ez dibihîzim ku Iraq dikare biryareke pir xirab bide û Nûrî el-Malîkî dîsa bibe serokwezîr. Dema Malîkî di desthilatê de bû, Iraq ket nava xizaniyê û kaoseke. Divê ev yek careke din neyê dubarekirin.”
Trump wiha dewam kir: “Ji ber siyaset û birdoziyên wî yên dîn, eger (Nûrî el-Malîkî) were hilbijartin, Amerîka wê êdî alîkariyê nede Iraqê. Eger em li wir nebin, tu şansê sekeftina Iraqê tune ye. Divê hûn Iraqê dîsa mezin bikin!”
Li gorî daxuyaniyên Ziya Nesrî yê ji serokên Hevpeymaniya Dewleta Hiqûqê, di rojên borî de Mukteda es-Sedr, serokê Tevgera Netewî ya Şîî, razîbûna xwe bi namzetiya Nûrî el-Malîkî re ragihandibû û Mercê Bilind a Şîîyan jî bersiva erênî dabû Çarçoveya Koordînasyonê.
Daxwazên Amerîkayê yên li dijî Malîkî di têkiliyên dîplomatîk de gelek caran têne dubarekirin. Wezîrê Derve yê Amerîkayê Marco Rubio jî di axavtina telefonê ya bi serokwezîrê demkî yê Iraqê Muhammed Şiya es-Sudanî re, îhtîmala ku el-Malîkî dîsa bibe serokwezîr wekî mijareke xemgîn ragihandibû.
Piştî hilbijartinên giştî yên 11’ê Mijdara 2025’an, pêvajoya namzet diyarkirina serokwezîr, serokê parlamentoyê û serokomar destpê kir. Heybet el-Halbûsî bûbû serokê nû yê Parlamentoya Iraqê.
PDK û YNK hîn namzeta hevpar a serokomariyê ranegihandine.
Nîqaşên li ser namzetiya serokwezîriyê ji aliyê Şîiyan ve jî berdewam in.
