Karwanek ji ciwanan di çarçoveya beşdarbûna ciwanan seferberiya giştî ya parastina Rojavayê Kurdistanê de çûn Deriyê Fîşxabûr. Lê belê, rayedarên derî yên aliyê Herêma Kurdistanê nehişt ciwan derbazî Rojava bibin. Ciwanên ku ev 4 roj bûn li benda derbazbûnê bûn, îro vegeriyan.
Yek ji wan ciwanên ku li Deriyê Fîşxabûr nehiştin derbazî Rojava bibin Welîd Ebdulrehman’e û têkildarî mijarê ji ajansa me re axivî û wiha got; “Em weke berpirsyartiyeke welatparêzî û netewî 70 ciwanên ji her çar parçeyên Kurdistanê li hev kom bûn û me xwest beşdarî seferberiya giştî ya Rojavayê Kurdistanê bikin. Em hemû ciwanên xwebexş (dilsoz) bûn.
Di navbera sînorê Başûr û Rojavayê Kurdistanê de, rayedarên Deriyê Fîşxabûr yên Herêma Kurdistanê em rawestandin. Piştî em sê şev û çar rojan jî li Deriyê Fîşxabûr man, destûr nedan me, em neçar man ku vegerin.”
Her wiha Welîd da zanîn ku ew li wir di şert û mercên dijwar de man, hewa sar û nebaş bû. Di dewamê de got; “Tevî şert û mercên dijwar û hewaya sar jî me dîsa nedixwest vegerîn. Ji ber ku armanca me derbazbûna Rojava bû. Lê di dawiyê de bi zextan em belav kirin û gotin ku divê hûn ji vir biçin.”
Di dawiyê de got; “Ez ji her kesî dixwazim ji bo alîkariya Rojavayê Kurdistanê çi ji destê wan tê bikin. Niha di navbera Kurdan de yekîtî heye. Ev yek ji bo Kurdan hesteke dilxweşkere û ger derfet hebe pir girînge ku were parastin. Em amade ne ku vegerin da ku Rojavayê Kurdistanê biparêzin.”
