Di nav de Hevserokê Giştî yê ESP’ê Murat Çepnî, rojnamevan û xebatkarên ETHA’yê Pinar Gayîp û Nadiye Gurbuz jî hene; 96 sosyalîst di serdegirtinên malan ên sibeha 3’yê Sibatê de hatin binçavkirin. Di nav kesên hatine girtin de sendîkavan, rojnamevan, siyasetmedar û hunermend jî hene.
Bertekên li dijî binçavkirina hejmareke zêde ya sosyalîstên ku siyasetmedar jî di nav de ne, berdewam dikin. Sendîka, rêxistinên pîşeyî yên rojnamevanan û siyasetmedaran bertek nîşanî tiştên hatine jiyîn dan û ev yek wekî “operasyona qirkirina siyasî” nirxandin.
Siyasetmedar û sendîkagerên ku me nêrînên wan girtin, van serdegirtinan wekî rêyeke nû ya zextê ya li ser mûxalefetê dibînin.
Hevserokê Şaxê Aksarayê yê SES’ê Dîren Can Kaya, serdegirtinên malan wekî krîmînalîzekirina têkoşîna kedê nirxand û der barê serdegirtinê de ev agahî dan: “Em hîn bûn ku di nav kesên bi serdegirtina malan hatine binçavkirin de Serokê Giştî yê sendîkaya DÎSK Limter-Îşê Devrîm Yurtsever, Serokê Giştî yê heyama berê Kamber Saygili, endamên lijneya rêvebir Kenan Hessas, Esvet Şahîn û sendîkagerên din jî hene. Binçavkirina sendîkagevanên ku her roj di nav karker û kedkaran de ne, navnîşana wan a sendîkayê diyar e, li kargeh û qadan têkoşîna ked û demokrasiyê dimeşînin, bi awayê serdegirtina malan, bi eşkere krîmînalîzekirina sendîkayê û têkoşîna kedê ye.
Wekî ku tê zanîn, Rêxistina Kedê ya Navnetewî (ILO) di mehên borî de encamên raporta Endeksa Mafên Gerdûnî ya ku Konfederasyona Sendîkayên Navnetewî (ITUC) her sal amade dike, bi konferansekê eşkere kiribû. Li gorî vê raporê, em dibînin ku Tirkiye di mijara azadiyên sendîkayî de di nav 10 welatên herî xirab de cih digire. Divê mirov bibîne ku sedema vê rewşê ev polîtîkayên zextê ne.
Di van rojên ku karker û kedkar mehkûmî mûçeyên di bin sînorê birçîbûnê de hatine kirin, mafên wan ên darayî, pîşeyî û demokratîk tên tunehesibandin; krîmînalîzekirina sendîkayan û xebatên sendîkayî bi van polîtîkayên zextê re, helwesta desthilatdariya heyî ya li hemberî karker û kedkaran careke din datîne holê. Ez dixwazim destnîşan bikim ku ev polîtîka bi armanca tunekirina hêviya têkoşîna demokratîkbûna welat in. Divê nûnerên hilbijartî yên karker û kedkaran demildest werin berdan.”
Rêveberê Sendîkaya Înşaat-Îşê Yunus Ozgur diyar kir ku zextên li ser Limter-Îşê hewildana tunekirin û tirsandinê ye û wiha got: “Serdegirtinên malan ên ku faşîzmê di dîroka 03.02.2026’an de li dijî gelek saziyên têkoşîna demokratîk û rêveberên sendîkaya me ya dost Limter-Îşê pêkanîne, di eslê xwe de hewildana tunekirin û tirsandina têkoşîna şoreşger û demokratîk e. Ev êrîşa faşîzmê tenê û tenê bi domandina bi biryar a têkoşîna çîna karker û girseyên kedkar a li dijî faşîzmê dikare were pûçkirin.”
Nûnera SODAP’ê Fatma Înce ya ku serdegirtinan wekî operasyona bêdengkirina mûxalefetê dibîne, der barê operasyonên li ser ESP’ê de wiha got: “Dostên me yên têkoşer ên ESP’î heta niha rastî gelek operasyonên siyasî hatin. Lê belê, ev operasyona siyasî ya ku di 3’yê Sibatê de pêk hat, li gorî yên berê gelekî firehtir e. Gelek dostên me yên ESP’î yên şoreşger û sosyalîst ku di qadên partiya siyasî, jin, ciwan, karker, ekolojî û çapemeniyê de têkoşîna rewa dimeşînin, hatin binçavkirin. Wezîrê Karên Hundir Ali Yerlikaya ev operasyon wekî ‘girtina 96 gumanbaran di operasyonên li dijî rêxistina terorê ya MLKP’ê de’ pêşkêşî rayagiştî kir. Armanca operasyonê ji aliyekî ve nîşandana hêzê ye bi serîlêdana çîroka serkeftinê ya ‘têkoşîna li dijî terorê’, ji aliyê din ve jî êrîşkirina li ser kesên ku li Rojhilata Navîn û li welatê me bi Kurdan re di nav têkoşîna hevpar de ne. Rejîma Qesrê dixwaze mûxalefeta civakî ya li hemberî krîza aborî, xizanî, kuştina jinan û talankirina xwezayê bêdeng bike. Lê divê were zanîn ku ev zext, gef û operasyon nikarin me, sosyalîstan, şoreşgeran û tevgera siyasî ya Kurd bitirsînin. ESP ne bi tenê ye!”
Berdevkê Serdemê yê SMF’ê Mahir Gurz destnîşan kir ku tiştên diqewimin hewildana tahkîmkirina desthilatdariyê ye û weha got: “Desthilatdariya AKP-MHP’ê ku nobedarê dilsoz ê cîhana paşverû ya emperyalîst e, norm û qanûnên xwe yên bûrjûwa jî binpê kiriye û bi awayekî topyekûn li dijî gel şer ragihandiye. Êrîşa berfireh a li ser ESP’ê jî wekî beşek ji vê dorpêça faşîst hatiye destpêkirin. Li hemberî sermayeya navnetewî û desthilatdariyan, kela bingehîn a berxwedanê şoreşger û sosyalîst in. Em ê di têkoşîna wekhevî, edalet, azadî û sosyalîzmê de bi biryar bin.”
Alîkara Seroka Giştî ya EHP’ê Nehir Sevim jî diyar kir ku ne gengaz e operasyonên desthilatdariyê asayî werin dîtin: “Em bi van operasyonên desthilatdariya siyasî nenas nînin. Ji ber berfirehiya vê operasyona ku rêveber û endamên saziyên wekî ESP, SKM, SGDF, DÎSK/Limter-Îş, Polen Ekoloji û BEKSAV’ê hedef girtine, ne gengaz e ku wekî operasyoneke asayî were dîtin. Li vir divê em behsa êrîşeke topyekûn bikin. Desthilatdarî ji aliyekî ve îdia dike ku teref û rêveberê pêvajoyeke diyalog û çareseriyê ye, ji aliyê din ve jî bi operasyonên bêbingeh gefan li hemû pêkhateyên mûxalefetê dixwe. Em ê li dijî hemû zext û astengiyên desthilatdariyê, piştgirî û têkoşîna xwe bidomînin.”
