Parlamentera Partiya Çepgitan a Parlamentoya Federal a Elmanyayê Janine Wissler bang li raya giştî ya cîhanê kir ku bala xwe bide Rojava. Janine Wissler diyar kir ku li Rojava destkeftiyên weke qanûna bingehîn a demokratîk, mafên civakî û wekheviya jin û mêran di bin talûkeyê de ne û got: ‘’Em pişta xwe nadin tiştên ku li Rojava diqewimin. Li Rojava projeyeke demokratîk a biqîmet di bin talûkeyê de ye. Şervanên Kurd, DAÎŞ têk birin û Êzîdî rizgar kirin. Em ê tu carî vê yekê ji bîr nekin û hemû caran piştevaniyê bidin van şervanan.’’
Janine Wissler destnîşan kir ku têkildarî serbestberdana endamên DAÎŞ’ê wêne û vîdeo hene, însan hatine qetilkirin û bombe hatine barandin û ev yek anîn ziman: ‘’Bila dawiyê li êrîşên li ser Rojava bînin! Divê cîhan bi tu awayî li hemberî vê yekê bêdeng nemîne.’’
Janine Wissler pişte Hikûmeta Fedral a Elmanyayê rexne kir, anî ziman ku artêşa Tirk bi salan e Roja û herêmên Kurdan bombebaran dike, tevî vê yekê jî Elmanya çekan dide êrîşkaran û got: ‘’Divê dawiyêli bazirganiya çekan a li gel Tirkiyeyê binîn’ Divê Erdogam li gel xalîçeya sor neyê pêşwazîkirin.’’
Her wiha Janine Wissler ji bo vexwendina Colanî ya ji bo Berlînê hikûmeta Elmanyayê rexne kir û got ku divê welatiyên Sûriyeyê neyên dersînorkirin. Janine Wissler a ku li Frankfurtê beşdarî çalakiya piştgiriya ji bo Rojava bû ev yek anîn ziman: ‘’Divê Hikûmeta Elmanyayê ya Federal vê yekê bi awayekî eşkere bîne ziman: Mafên gelan û mafên însanan ji her tiştî qîmettir in. Ev prensîb ji bo Kurdistanê jî derbasdar e. Bijî Rojava, bijî Kobanê. Jin, Jiyan Azadî.’’
Profesor Teqawid ê Beşa Civaknasiyê ya Zanîngeha Nanterre ya Parîsê û hev-rêveberê Koma Xebatên Neolîberalîzm û Alternatîfan Christian Laval jî ev yek anîn ziman: ‘’Dostên Rojavayê, êrîşên milîsên Îslamparêz ên artêşa Sûriyeyê û Enqere piştevaniya wan dikin ên li ser tecrûbeya gelê Kurd a demokratîk bi xemgînî û hêrseke mezin temaşe dikin. Rojava, di birêxistinbûna civakî û siyasî de deriyekî nû vekir; demokrasiya ji zemînê. Ji ber vê taybetmendiya xwe îlhamê dide gelek tevgerên pêşvexwaz ên li çar aliyên cîhanê. Divê hemû kesên demokrat, piştgiriyê bide şoreşa gelê Kurd a li Rojava.’’
Parlamentera endama berê ya Meclîsa Federal a Swîsreyê, dîroknas û Profesor Stefanie Prezioso jî got ku ew piştgiriyê dide mafê gelê Kurd ê diyarkirina çarenûsa xwe û ev yek anîn ziman: ‘’Her wiha ez piştgiriyê didim tevgerên pêşvexwaz û demokratîk ên li dijî polîtîkayên otorîterên desthilatdariya Sûriyeyê ku li wir HTŞ serwer e û sepanên ku rageşiyên li welêt ên mezhebî û etnîkî gur dikin, têdikoşin.’’
