Kongreya Demokratîk a Gelan (HDK), Tevgera Jinên Azad (TJA) û Partiya Wekhevî û Demokrasiyê ya Gelan (DEM Partî), bi boneya salvegera Komploya Navneteweyî ya 15’ê Sibatê li Qada Aksarayê ya navçeya Fatîhê ya Stenbolê daxuyanî dan.
Platforma Saziyên Demokratîk a Stenbolê li Qada Aksarayê ya Stenbolê li dijî komploya navnetewî daxuyanî dan. Parlamenterên DEM Partiyê, Hevserokên DEM Partiyê yên Stenbol û navçeyan, Dayikên Aştiyê, HDK, TJA, nûner û rêveberên saziyên civakî û gelek welatî tev li çalakiyê bûn. Li qadê dirûşmeyên “Bijî Serok Apo”, “Bijî Berxwedana Rojava” Bê Serok Jiyan Nabe” hatin berzkirin û pankarta “Bi roniya heqîqetê ber bi azadiyê ve” û “15’ê Sibatê dişkinî, bi rêberê azadiyê re 27ê Sibatê înşa dikin” û dowîzên “Komploya duyemîn a navneteweyî li Rojava têk çûye”, “Azadî ji Rêber Apo re, statü ji Rojava re” hatin hilgirtin. Hevseroka Stenbolê Arîfe Çinar di daxuyaniyê de axivî û got: “Bi têkoşînê komplo vale derket. Îro pêvajo heye lê hê jî tecrîd berdewam dike. Em dizanin ku pêvajo bi azadiya Rêberê Gelê Kurd Abdullah Ocalan ve girêdayî ye. Ji bo aştiyê divê mafê hêviyê ji bo rêzdar Ocalan bê pêkanîn. Li gorî fikra e aştî bi sepandina mafê hêviyê ve pêkan e.”
‘DEMOKRATÎK MODERNÎTEYÊ RÊYA AŞTIYÊ VEKIRIYE’
Rêvebera DEM Partiyê ya Stenbolê Gîzem Kuzuk anî ziman ku Rêber Apo derbarê komployê de pênaseya “Di şexsê min de hat xwestin li Rojhilata Navîn pêşiya çareseriya gelê Kurd bigirin û gelê Kurd bêstatû bihêlin” û wiha got: “Gelê Kurd û dostên wan ji bo komployê vale derxin bi bedelên giran dan. Îro li Kurdistan, Tirkiye û Rojhilata Navîn qeyranên girîng diqewimin, sedema wan jî tecrîda Îmraliyê ye. Lê li gel dorpeçkirinê jî fikrên bîrêz Abdullah Ocalan li her aliyê Rojhilata Navîn belav dibe. Bi taybet jî sîstema Rojava dibe hêvî. Paradîgma Demokratîk Modernîte ya rêzdar Ocalan ji bo gelan rêya aştiyê vekiriye. Li dijî sernaryoyên qirêj bi manifestoya Civaka Demokratîk bersiva herî xurt hatiye dayîn. Navnîşana çareseriyê diyar e, ji ber vê divê tavilê azadiya rêzdar Ocalan bê misogerkirin.”
