Fermandarê Giştî yê Hêzên Sûriya Demokratîk (QSD) Mazlûm Ebdî piştî hevdîtina di çarçoveya Konferansa Ewlehiyê ya Munihê de bi Serokê Herêma Federe ya Başûrê Kurdistanê Nêçîrvan Barzanî re, pirsên rojnamegeran bersivandin. Ebdî, bersiv da gotinên Wezîrê Karên Derve yê Sûriyeyê Esad Şêbanî ku digot; “Daxwaza QSD’ê ya otonomiyê nîn e.”
Mazlûm Ebdî diyar kir ku rayedarên Wezareta Karên Derve ya Sûriyeyê di mijara têgeh û navan de kêşeyan dijîn û got: “Pirsgirêkên dewleta Sûriyeyê bi nav û têgehan re heye. Lê belê em, daxwaza rêveberiyeke herêmî ya Kurd/rêveberiyê dixwazin. Navê çi dibe bila bibe, ya girîng ew e ku ev Kurd be û şêweyê rêveberiya herêmî biparêze. Em, avadaniyeke ku her kes xwe tê de bi ewle hîs dike, bi taybetî taybetiyên Kurdan û çanda wan tê parastin, êriş li ser Kurdan nayên kirin û Kurd bi xwe herêmên xwe birêve dibin daxwaz dikin.”
Mazlûm Ebdî da zanîn ku hevdîtina wî ya bi Nêçîrvan Barzanî re erênî derbas bûye. Ebdî, got ku her çend nêzikatiyên şandeyên Kurd ên cuda hebin jî, di mijara hedefê de bi hev re tev digerin û ev yek destkeftiyeke girîng e.
Pirsên ji Ebdî Hatin kirin û bersivên dane wiha ne:
Pirs: Min ji Wezîrê Karên Derve yê Sûriyeyê pirsî, got ku Kurd daxwaza otonomiyê nakin. Gelo Kurdan daxwaza otonomiyê kiriye?
Mazlûm Ebdî: Pirsgirêkên dewleta Sûriyeyê bi nav û têgehan re heye. Lê belê em, daxwaza rêveberiyeke herêmî ya Kurd/rêveberiyê dixwazin. Navê çi dibe bila bibe, ya girîng ew e ku ev Kurd be û şêweyê rêveberiya herêmî biparêze.
Pirs: Hevdîtinên we girîng bûn, gelo tu sozeke piştgiriyê ji bo we hate dayin, bi taybet jî ji bo otonomiyê? Çi temînat ji bo we hatin dayîn?
Mazlûm Ebdî: (Di hevdîtinên me yên giştî de) Her kes hemfikir e ku divê Kurd xwedî maf bin, xweseriya herêmên Kurdan bê dîtin, li ser herêmên Kurdan êriş neyên kirin û Kurd bikarin herêmên xwe bi xwe bi rê ve bibin.
Pirs: Gelo hevdîtina we ya bi birêz Serokê Herêma Kurdistanê re çawa derbas bû? Her wiha heke komên çekdar dîsa êrişî Kurdan bikin, gelo ew hêza hikûmeta Sûriyeyê heye ku bêyî ferq û cudahiyê bike hemû sûriyeyiyan biparêze?
Mazlûm Ebdî: Me spasiya Birêz Serokê Herêmê kir, ku ji bo hatina me ya vê derê bû alîkar. Her çend nêzikatiyên şandeyên Kurd ên cuda hebin jî, di mijara hedefê de bi hev re tev digerin û me bi hev re xebatên baş kir. Di xebatan de armanc yek bû, em şandeya Kurd weke yek dibînin.
Pirs: Di hevdîtinên we kirin de gelo we ji rayedarên navneteweyî xwest ku bên serdana Rojava?
Mazlûm Ebdî: Belê, me di hemû hevdîtinan de anî ziman. Ji bo peymana me ya bi Şamê re bê bicihanîn, me got ku divê mekanîzmaya garantiyê hebe.
Pirs: QSD dê weke sê tûgayan tevlî artêşa Sûriyeyê bibe. Gelo ji bo Pêşmergeyên Roj vegerin Rojava hûn bi rayedarên Şamê re axivîn?
Mazlûm Ebdî: Ji bo me tu pirsgirêkek nîn e, her ciwanekî Kurd dikare vegere û di wan her çar tûgayên di bin sîwana artêşa Sûriyeyê de tên avakirin û di nava hêza jinan de cih bigirin. Pêşmergêyên Roj jî dikarin tevlî vê bibin û erka xwe bicih bînin. Ev ji bo parastina Rojava pêwîst e.
Pirs: Civînên we bi Amerîkayî û Îngilîzan re çêbûn, gelo ji bo rageşiyên li Rojava rû dayin careke din dubare nebin, tu garantî dane we yan na?
Mazlûm Ebdî: Me ji her kesî xwest ku tiştên hatine jiyîn dîsa dubare nebin. Heke dubare bibin, divê helwestekî nîşan bidin û me xwest ji bo bicihanîna peymanê mekanîzmayeke were avakirin.
Pirs: Agahî hene ku we ji bo dayina otonomiyê bi Amerîkayiyan re hevdîtin kirine, gelo ev rast e?
Mazlûm Ebdî: Em têkildarî hûrgiliyên vê mijarê neaxivîn. Lê belê em li ser wê sekinîn ku li herêmên Kurdan xweseriya xwe biparêzin.
