27 sal di ser serhildana 22’yê Sibata 1999’an a gelê Rojhilatê Kurdistanê ya li dijî Komploya navnetewî ya li ser Rêber Apo re derbas dibe. PJAK’ê bi boneya salvegera serhildanê daxuyaniyek da.
Di daxuyaniya PJAK’ê de hate gotin: “Berî 27 salan di 15’ê Sibata 1999’an de gelê me ji bo şermezarkirina komploya navnetewî ya li dijî Rêberê Gelê Kurd Abdullah Ocalan dest bi serhildanê kirin û ev serhildan di 22’yê Sibatê de gihişt lûtkeyê. Em şehîdên vê serhildanê bi rêzdariyek mezin bibîrtinin. Îro têkoşîna azadiyê ku gihiştiye lûtkeyê, em soza pêkanîna armancên şehîdan û gelê xwe dubare dikin.”
Di dewamê de hat diyarkirin: “Serhildana 22’yê Sibatê bû werçerxek dîrokî ji bo serhildan û protestoyan, her wiha bû bingehek ji avabûna tevgerên li seranserî Îranê re. Ew serhildan ji şoreşa ‘Jin, Jiyan, Azadî’ re bû bingehek civakî.”
Di beşek din a daxuyaniyê de PJAK dibêje: “Eger îro hêviya me bi têkoşîna azadî û demokrasiyê zêde bûye, destkeftên mezin li her çar beşên Kurdistanê bidest ketine, ew bi saya xwîna şehîdên serhildana 22’yê Sibatê ye. Ew serhildan ji ber giringiya xwe di dîroka gelê me de hatiye tomarkirin. Îro jî em dikarin li ser bingehê daxwazên azadîxwaz û demokratîk yên şehîdan ku azadiya jin, azadiya ekolojî û civakê bû, şoreş û ronesansa xwe berdewam bikîn.”
Di dirêjiya daxuyaniyê de PJAK bang li tevayî gelê Kurd ê li Rojhilatê Kurdistanê kir û got: “Di vê qonaxa ku Îran li ber guhertinên dîrokî yên mezin de ye, divê gelê me li qadan be. Şoreş wêdemê bi serdikeve, dema ku gelê me di nava dilê şoreşê de be û biryara esasî ji bo rêvebirina civakê dabe. Ev daxwaza wê serhildanê bû û îro jî bi saya wê serhildanê hîn bêhtir nêzî azadiyê bûne.”
Di dawiyê de jî PJAK got: “Bi azadiya Rêber Apo û gelê Kurd dikarîn berê xwe bidin qonaxek birfirehtir a têkoşîna siyasî û Rojhilatê Kurdistanê bi serkeftina dîrokî tacîdar bikin.”
