Li Wanê bi wesîleya 21’ê Sibatê Roja Zimanê Dayikê ya Cîhanê bi pêşengiya Platforma Saziyên Demokratîk, li qada bajêr daxuyanî hat dayîn û şahiyek hat lidarxistin. Girseya ku pankarta “Statuya Kurdî, perwerdehiya bi Kurdî” hildan, bênavber dirûşmeya “Bijî zimanê Kurdî” berzkirin û li ber erbaneyan govend gerandin.
Piştre Rêveberê KURDÎGEH’ê Gokhan Işik, axivî û diyar kir ku divê Kurdî di hemû astên perwerdehiyê de, ji pêşdibistanê heta zanîngehê, zimanê perwerdeyê be û divê di qada giştî de (dadgeh, nexweşxane, ofîsên hikûmetê û hwd.) were bikaranîn.
Gokhan Işik, ji bo zimanê Kurdî daxwaza statuya fermî kir û got ku divê cihên bi Kurdî hatibûn guhertin, jinûve bibe Kurdî. Gokhan Işik, anî ziman ku divê di pêvajoya danûstandinê yên berdewam de astengiyên li pêşiya ziman, çand û nasnameya Kurdî werin rakirin.
Hevberdevka Înîsiyatîfa Yekîtiya Demokratîk Gulcan Kaçmaz Sayyîgît, jî da zanîn ku ji sala 1924’an û vir ve polîtîkayên asîmîlasyonê li dijî zimanê Kurdî têne meşandin. Gulcan Kaçmaz Sayyîgît, diyar kir ku mafê du saetan dersên bijarte yên zimanê Kurdî di hefteyê de têrê nake û destnîşan kir ku divê zimanê Kurdî statuya fermî bi dest bixe û bibe zimanekî perwerdeyê. Gulcan Kaçmaz Sayyîgît, anî ziman ku Rêber Apo bi banga Civaka Demokratîk û Aştiyê re dixwaze hemû ziman azad bibe û got ku ew ê têkoşîna ji bo azadiya ziman bidomînin.
Çalakî piştî daxuyaniyê bi gerandina govendên gelêrî û dirûşmeya “Bijî zimanê Kurdî” bi dawî bû.
