Ekolojîst Cemîl Aksû ku di serdegirtina malan a 3’ê Sibatê ya li hemberî endamên Partiya Sosyalîst a Bindestan hate binçavkirin, nêrînên wî yên têkildarî têkoşîna ekolojiyê û tevlîbûna li bîranînên Komkujiya Pirsûsê sûc hate dîtin.
Siyasetmedar, rojnamevan, hunermend, ekolojîst jî di nav de 105 kesên ku 3’ê Sibatê di serdegirtina malan de hatin binçavkirin piştî 4 rojên li binê çavan 83 ji wan hatibûn girtin. Sûcdariyên ku li Cemîl Aksû hatin kirin jî radix pêş çavan bê girtin û biçavkirin çiqasî bê bingeh in.
TEVLÎBÛNA LI BÎRANÎNA PIRSÛSÊ SÛC HATE HESIBANDIN
Di nava sûcdariyên li Aksû hatin kirin de ya herî zêde balê dikişîne tevlîbûna wî ya li bîranîna 20’ê her mehê ya li Kadikoyê bû ku têkildarî Komkujiya Pirsûsê tê lidarxistin. Di dosyayê de ku wêneyên Aksû yên li bîranînê hate bicihkirin, ciwanên ku di komkujiya Pirsûsê de jiyana xwe ji dest dan weke ‘endamên rêxistina terorê’ hatin pênasekirin, her wiha tevlîbûna li bîranînê jî weke sûc hate nîşandan.
Her wiha axaftina bi telefonê ya Aksû ya bi hevalekî xwe re li ser Kanal Îstanbol kir, li dosyayê hate bicihkirin. Polîs ev axaftin weke delîlek ji bo endametiya rêxistinê pêşkêş kir.
FÎGEN YUKSEKDAG WEKE ‘ENDAMA RÊXISTINA TERORÊ’ HATE PÊNASEKIRIN
Di dosyayê de ku beşdariya li çalakiya sala 30’emîn a rojnameya Atilimê jî weke sûc hate nîşandan, ji bo Hevseroka Giştî ya HDP’ê ya dema derbasbûyî Fîgen Yuksekdag ku peyama piştgiriyê ji çalakiya rojnameyê re şand ‘endama rêxistina terorê’ hate gotin. Axaftin û peyamên di çalakiyê de hemû weke ‘sûc’ hate nîşandan û pirsa ‘bi fermana kê tevlî çalakiyê bûye’ ji Aksû hate pirsîn.
PIRTÛKÊN LI SER DENÎZ GEZMÎŞ Û MAHÎR ÇAYAN Û KOVARA MODERNÎTEYA DEMOKRATÎK DELÎL HATE NÎŞANDAN
Pirtûk û kovarên di serdegirtina mala Aksû de hatin desteserkirin weke delîla ‘endametiya rêxistinê’ li dosyayê hate bicihkirin. Pirtûkên li malê hatin dîtin ên li ser Denîz Gezmîş û Mahîr Çayan, hin hejmarên kovarên Modernîteya Demokratîk, Jin a Sosyalîst û Teoriya Marksîst weke delîlên sûcdariya endametiyê hatin nîşandan.
