Di çarçoveya peymana 29’ê Çileyê ya di navbera QSD û hikumeta demkî ya Sûriyeyê de, koma yekemîn a koçberên ji Efrînê, ji Hesekê ber bi warê xwe ve bi rê ket.
Koma yekemîn ku ji 400 malbatan (nêzî 3 hezar kes) pêk tê, dê di bajarên Reqa, Tebqa û Helebê re derbas bibe û bigihêje Efrînê.
Karwanê koçberan ji sedan erebeyan û otobusên taybet ên Meclisa Koçberên Efrîn-Şehbayê û Parastina Sivîl a Sûriyeyê pêk tê.
Karwanê koçberan bi amadebûna Hêzên Ewlekariya Hundirîn, cîgirê fermandarê Hêzên Ewlekariya Hundirîn ên Hesekê Mehmûd Xelîl û ji fermandarên Hêzên Asayîşê Nesrîn Abdullah û hejmareke berpirsên hikumetê yên girêdayî vê dosyayê ber bi warê xwe ve bi rê ket.
Parêzgarê Hesekê Nûredîn Ehmed di dema kombûna malbatan de, amadekariyên vegera wan şopandin. Ehmed di daxuyaniyeke çapemeniyê de diyar kir ku ev piştî salên dirêj ên koçberiyê, ji bo gelê Efrînê kêliyeke kêfxweşiyê ye.
Ehmed hêviya xwe anî ziman ku vegera bo Efrînê bibe destpêka qonaxeke nû û aştiyê.
Nureddîn Ehmed diyar kir ku ew ê bi malbatan re di nava têkiliyê de bin da ku rêwîtiya wan bişopînin û vegera wan a ewle misoger bikin.
Ji bajarê Qamişloyê vê sibehê malbatên koçber ber bi Hesekê ve ketibûn rê û tevî koma koçberan a li Hesekê bû û bi girseyî çûn.
Hêzên Ewlekariya Hundirîn (Asayîş) di 7’ê Adarê de ragihandibû ku dê koma yekem a koçberên Efrînê yên ji navçeyên Şiyê, Cindirês û Mabata yên Efrînê dê 9’ê Adarç (îro) ji Cizîrê ber bi Efrînê ve here.
Mehmûd Xelîl ku bi komê re bû, ji çapameniyê re got xebat ji bo vekirina korîdoreke ewle ber bi Efrînê ve di nav 3 rojan de, tê kirin û hewldanên vegera hemû koçberan beriya Newrozê, dewam dikin.
