Şerê navbera Îran, Îsraîl û Dewletên Yekbûyî yên Emerîkayê (DYE) zerara herî mezin dide gelan. Bi taybetî gelên li Îranê ku di bin ambargoyeke giran de ne, ji aliyê peydakirina xurekê, ragihandin û stargehê ve di nava zor û zehmetiyan de ne. Di vê demê de ku gefên têkildarî şer dewam dikin, hem li Iraqê hem jî li ser Rojava gotinên êrişkariyê careke din di rojevê de ye.
Alîkara Hevserokên DEM Partiyê ya ji Komîsyona Gel û Baweriyan Berpirsyar Yuksel M ûtlû li hemberî polîtîkayên şer işaret bi girîngiya têkoşîna hevpar a gelan û xeta rêya sêyemîn kir. Yuksel Mûtlû got, “Ruhê tenêbûnê bi têkoşîna hevpar dikare ji holê bê rakirin” û anî ziman ku girîngiya yekîtiya gelê Kurd careke din derketiye holê.
Yuksel Mûtlû ragihand ku şerê li herêmê ne tenê pêvajoyeke leşkerî ye û got, hewl tê dayin ku Rojhilata Navîn jinûve bê dîzaynkirin. Yuksel Mûtlû diyar kir ku pêvajoya bi Sûriyeyê re destpê kir îro bi Îranê re dewam dike û hêzên modernîteya kapîtalîst Rojhilata Navîn jinûve dîzayn dikin. Yuksel Mûtlû ragihand ku ev atmosfera kaosê firsendekê dide derdorên muxalîf û gelan.
‘TÊKOŞÎNA HEVPAR A GELAN GELEKÎ GIRÎNG E’
Yuksel Mûtlû bal kişand ser mînaka Îranê û got, “Di nava vê kaosê de eger berxwedêr, muxalîf û gelên cuda bi hev re têkoşîneke hevpar nemeşînin; bi hilweşîna netewe dewlet a tekperest re wê hewl bidin yeka nû li şûna wê ava bikin. Hêzên modernîteya kapîtalîst dewleteke riziyayî ya ku li ber çavên gel qediya ye hildiweşînin û yeka nû li şûna wê ava dikin. Li Îranê şerekî li derveyî mirovahiyê diqewime. Lê belê li Îranê rejîmeke mola ya totalîter heye û ev rejîmeke Îslamî ye ku zextê li çand, civak û gelên li Îranê dike; jinên Kurd ên ciwan, mêr ên Kurd ên ciwan darve dike. Ya rast ev rejîm divê biçe.”
Yuksel Mûtlû destnîşan kir ku di nava şerê li Rojhilata Navîn de divê gelê Kurd xwe biparêze û got, “Hêzên modernîteya kapîtalîst Rojhilata Navîn bi rengekî giştî dîzayn dikin. Ev dîzayn Iraq, Îran û Sûriyeyê digire nava xwe. Îsraîl û Emerîka ji bo xurtkirina hêzên xwe û ewlekariya xwe, dixwaze hemû hêzên ku dikarin li ber wan rabin tasfiye bike. Di vê çarçoveyê de Kurd li çar parçeyan têkoşînê dimeşînin. Birêz Ocalan di hevdîtinên Îmraliyê de diyar kiribû ku divê Kurd xwe biparêzin.”
‘EM SIYASETA RÊYA SÊYEMÎN DIMEŞÎNIN’
Yuksel Mûtlû diyar kir ku di vê pêvajoya şer de aliyê ku xurt bisekine û xwe bispêre gel wê bi ser bikeve û ragihand ku yekane xeta partiya wan aştî ye. Yuksel Mûtlû got, “Paradîgmaya ku Birêz Ocalan danî holê nîşan dide ku li Rojhilata Navîn hêzên modernîteya demokratîk û hêzên modernîteya kapîtalîst li hemberî hev şer dikin. Di vî şerî de aliyê ku bi xurtî bisekine, pişta xwe bispêre gel û têbikoşe wê bi ser bikeve. Em ne dibina liyê Emerîkayê ne jî aliyê rejîma mola ya li Îranê. Em siyaseta rêya sêyemîn dimeşînin ku gel têkoşîna xwe dimeşîne. Bicihhatina paradîgmaya civaka demokratîk a li Rojhilata Navîn wê aramiyê ji jin, bawerî û derdorên cuda re bîne.”
Yuksel Mûtlû destnîşan kir ku ev paradîgma dikare bi ruhê yekîtiyê û têkoşîna rêxistinbûyî bê pêkanîn.
