Tevgera Çand û Hunerê ya Ewropa (TEV-ÇAND) bi daxuyaniyeke nivîskî helbestvan Ehmed Huseynî bi bîr anî ku 10’ê Adarê li Swîsreyê jiyana xwe ji dest da.
Daxuyanî bi vî rengî ye:
“Bi xemgîniyeke mezin me nûçeya koça dawî ya rewşenbîr û Helbestvanê mezin Ehmed Huseynî bihîst.
Huseynî ku weke serkêşê kerwanê helbesta nûjen a serbest dihate naskirin, weke pira di navbera nivşên nû û yên kevin de jî roleke mezin lîst.
Bi şêwazê xwe yê taybet, ne tenê hevok, peyv jî diafirandin, lewma weke şêxê Peyvê jî dihate naskirin.
Hest û peyv bi şêweyekî felsefîk dihûnand û pêşkêşî xwendevanan dikir.
Bi serkeftina şoreşa Rojava re wî xeyal û baweriya xwe ku , digot, ‘Hezkirina axê, li ser singa wê temam dibe’ pêk anî û vegeriya Rojava.
Li gel gelek karên wêjeyî û çalakiyên rewşenbîrî yên welatparêzî, ew yek ji serkêş û damezrênerên Hevgirtina Rewşenbîrên Rojavayê Kurdistanê bû.
Bi vegera xwe ya Rojava re, rê ji Hevgirtina Rewşenbîrên Rojavayê Kurdistanê (HRRK) re vekir ku navenda xwe vegerîne Rojava.
Ehmed Huseynî ji peyvan wêdetir ji axa welat hez dikir.
Lewma wî biryara vegera xwe dabû.
Bi kesayetiya xwe ya dilnizm, bi hevaltiya xwe ya germ,bi rewşenbîriya xwe ya pijyayî û têr, dikarîbû bi her nivşî re hevaltiyê bike û cihê xwe di dilê her kesî de çêke.
Ev du sal bûn ku bi nexweşiyê re şer dikir, lê mixabin ku hêza wî ewqas têra berxwedanê kir.
Em weke Tevgera Çand û Hunera Demokratîk, xwe deyndarê hezkirina Ehmed Huseynî ya ji welat û azadiyê re dibînin.
Ew hevalê Huner û Çandê bû .
Ew piştgirê tekoşîn û Berxwedanê bû.
Ew Evîndarê welatê xwe bû.
Serê gelê me û hezkiriyên wî sax be.”
