Bi hezaran kes ji şêniyên Rojava bi Kurd, Ereb û Suryan û pêkhateyên din, endamê Desteya Hevserokatiya PYD’ê Şehîd Salih Muslim oxir kir. Merasîma oxirkirinê ji aliyê Meclisa Malbatên Şehîdan a bajarê Qamişloyê ve li Stadyuma Şehîdên 12’ê Adarê pêk hat. Siyasetmedar û nûnerên eşîran ên Kurd û Ereb, şandeyeke partî û tevgerên siyasî yên ji Bakur û Başûrê Kurdistanê jî beşdarî merasîmê bûn.
Merasîmê bi rêzgirtinê destpê kir. Piştre peyama Rêber Apo ya ji bo Salih Muslim hate xwendin.
Bi navê Meclisa Malbatên Şehîdan a Qamişloyê hevserokê meclisê Ubeyd Etê axivî. Ubeyd Etê di axaftina xwe de têkoşîna zêdetirî 50 salan a şehîd Salih Muslim a di oxirina doza Kurd de vegot û diyar kir ku şehîd Salih Muslim bê teredudu û bê muqabil tê koşiya, di mercên herî zehmet de xizmeta gelê xwe kir, li hemberî rejîma Baasê û komên çekdar û siyasetên dewleta Tirk ên li dijî herêmê têkoşîn kir.
Etê di dewama axaftina xwe de bi bîr xist ku ne tenê gelê Rojava, lê parçeyên din ên Kurdistanê ji ber koça dawîn a Salih Muslim xemgîn bû. Etê di dawiya axaftina xwe de di dawiyê de got, wê şopdarên xeta şehîdan bin ta xeyalên wan bi cih werin.
Di merasîmê de endama Desteya Hevserokatiyê ya PYD’ê Foza Yûsif jî axivî. Foza Yûsif sersaxî ji gelê Kurd re xwest û piştevaniya Kurdan li hemû aliyên Kurdistanê, ji Qamişlo, Hewlêr, Silêmaniyê, Amed û Mehabadê silav kir.
Foza Yûsif anî ziman ku Salih Muslim xwedî dîrokeke dirêj a têkoşîna azadiyê ye, ji salên 1980’yî ve bê westan kar kir, ramanên Rêber Abdullah Ocalan belav dikirin û mafên gelê Kurd diparastin. Fozayê destnîşan kir ku Salih Muslim li hemberî rejîma Baasê jî tê koşiya û wiha domand: “Ji aliyê rejîmê ve hat girtin û îşkence lê hat kirin. Tevî vê jî rojeke ji parastina doza gelê xwe dudilî nebû. Şervanek bû ku gotina heqiyê bang dikir. Ji malbateke welatparêz e ku di nava refên şoreşê de xwedî kedeke mezin e.”
Foza Yûsif anî ziman ku şehîd Salih Muslim ne tenê siyasetmedar bû, di heman demê de nivîsakr û wêjevanê Şoreşa Rojava bû, pirtûkên Rêber Abdullah Ocalan wergerandin da ku hişmendiya li Kurdistanê bi pêş bixe.
Foza Yûsif her wiha bi bîr xist ku şehîd Salih Muslim ji bo avakirina yekitiya neteweyî ya Kurd têkoşîneke demdirêj kir û got: “Malbateke welatparêz, democrat û têkoşer ava kir. Zarokên xwe tev li şoreşê kir. Kurekî wî ji bo parastina Rojava ji çeteyên DAIŞ’ê şehîd bû. Di heman demê de piştevanî doza jinan bû. Ji bo azadiya jinan û bidestxistina mafên wan û beşdarbûna wan kar kir.”
Foza Yûsif anî ziman ku ala kesk, sor û zer wê li ba bimîne û têkoşer bidome da ku hêviyên şehîdan pêk werin û mafên gelê Kurd di destûrê de werin nivîsandin.
Di merasîmê de şandeyeke YNK’ê gurzên gulan danîn ser darbesta şehîd Salih Muslim û bi navê serokê YNK’ê Bafil Talabanî, Luqman Werdî axivî.
Bi navê siyasetmedarên ji Başûr û Rojhilatê Kurdistanê, siyasetmedarê ji Başûr Serdar Abdullah jî axivî.
Keça şehîd Salih Muslim, Perwîn Muslim jî axivî û spasiya rayedarên Başûrê Kurdistanê kir û soza domandina rêya bavê xwe da.
Di dawiyê de hevrê û hezkiriyên şehîd Salih Muslim cenaze ber bi bajarê Kobanê ve bi rê kir. Li Kobanê wê bi merasîmekê were oxirkirin.
