Partiya Yekitiya Demokratîk (PYD), ji bo endamê Desteya Hevserokatiyê ya partiyê şehîd Salih Muslim merasîmên sersaxiyê li bajarên Qamişlo û Dêrikê li dar xistin.
QAMIŞLO
Merasîma sersaxiyê li Hola Rehma ya Qamişloyê bi beşdariya hevseroka PYD’ê Perwîn Yûsif, endam û rêveberên partiyê, endamên Însiyatîfa Azadiya Rêber Abdullah Ocalan, nûnerên partiyên siyasî, TEV-DEM, Kongra Star, Kongreya Îslama Demokratîk, saziyên Rêveberiya Xweser û şêniyên Qamişloyê pêk hat.
Li hola merasîmê, wêneyên şehîd Salih Muslim, wêneyên Rêber Apo, alên PYD û TEV-DEM’ê hatin daliqandin.
Merasîmê bi deqeyeke rêzgirtinê dest pê kir. Piştre hevseroka PYD’ê Perwîn Yûsif axivî. Perwîn Yûsif di kesayeta şehîd Salih Muslim de hemû şehîdên azadiyê bi bîr anîn û got: “Hevrê Salih Muslim kedeke mezin di siyaeta demokratîk de da. Ne tenê siyasetmedar bû, lê di heman demê de bedelên giran dan. Dema ku pêdiviya gel bi siyasetê hebû, xebateke mezin kir. Welatparêz bû. Xebata wî di nava partiya me de mezin û dîrokî bû.”
Perwîn Yûsif bi zimanên kurdî û erebî jiyannameya şehîd Salih Muslim xwend.
Piştre bi navê Rêveberiya Xweser, hevserokê Meclisa Rêveber a Kantona Cizîrê Hesen Şero û hevseroka TEV-DEM’ê Remziye Mihemed, bi navê Desteya Rûspiyan Hesen Ebû Tey, bi navê Meclisa Gel a Til Temirê Gulîxan Sofî, bi navê Kongra Star Gulîstan Gulo û sekreterê Partiya Demokrat a Kurd li Sûriyeyê Ciwan Siko axivîn.
Di axaftinan de keda şehîd Salih Muslim di şoreşa Rojava de, siyaseta demokratîk û mafên jinan de hat vegotin.
Qebûlkirina taziyeyê dê heya saet 17.00’an dewam bike.
DÊRIK
Nivîsgeha PYD’ê ya bajarê Dêrikê jî merasîma sersaxiyê li nivîsgeha partiyê li dar xist. Bi dehan şênî û endamên tê de Asayîşê amade bûn.
Merasîmê bi rêzgirtinê dest pê kir. Pişte endamê nivîsgeha PYD’ê ya Dêrikê Yûsif Osman axivî û got, şehîd Salih Muslim sembola aştiyê ye û jiyana xwe ji bo doza kurdî veqetandibû. Yûsif Osman soza şopandina xeta şehîd Salih Muslim da.
Sersaxî dewam dike.
