Şerê li Rojhilata Navîn du hefte li pey xwe hişt. Ji aliyan daxuyaniyên tund û êrişên leşkerî dewam dikin.
ÎRAN: ME LI NAVENDÊN EWLEKARIYÊ XIST
Artêşa Îranê roja Yekşemê daxuyaniyek da û diyar kir ku bi droneyan li Îsraîlê li hin navendên ewlekariyê û polîsan xistine.
Di daxuyaniya Ajansa Nûçeyan a Fermî ya Îranê IRNA de hate gotin, “Biryargehên polîsan û navendên ewlekariyê yên rejîma siyonîst bi êrişên droneyan ên xurt hatin bombekirin.”
PARÇEYÊ FUZEYÊ LI KONSOLOSXANEYA DYE’YÊ KET
Li gorî çapemeniya Îsraîlê, parçeyekî fuzeyê yê Îranê li avaniya Konsolosxaneya Dewletên Yekbûyî yên Emerîkayê (DYE) ya li Îsraîlê ket. Têkildarî encama bûyerê agahî bi dest neket.
ÎRANÊ HIŞYARÎ DA EWROPAYÊ
Wezîrê Karên Derve yê Îranê Abbas Arakçî bi Wezîrê Karên Derve yê Fransayê re axivî û diyar kir ku divê welatê wan xwe ji wan gavan vegire ku şerê li Rojhilata Navîn hîn giran bike.
Ev daxuyanî piştî banga Serokê DYE’yê Donald Trump hate kirin ku Trump ji hin welatan xwestibû, ku ji bo ewlekariya deryayî ya li Tengava Hurmuzê keştiyên xwe yên şer bişînin. Îranê piştî destpêkirina êrişên DYE û Îsraîlê trafîka deryayî ya li tengavê bi pratîkê de sekinandibû.
LONDON: GELEKÎ GIRÎNG E KU RAGEŞÎ KÊM BIBE
Wezîrê Enerjiyê ya Îngilistanê Ed Miliband destnîşan kir ku gelekî girîng e ku rageşiya li Rojhilata Navîn bê rawestandin.
TRUMP: JI BO LIHEVKIRINA BI ÎRANÊ RE ŞERT Û MERC GUNCAW NÎNE
Serokê DYE’yê Donald Trump li gel maliyeta aboriyê ya şer jî anî ziman ku ew naxwaze di asta heyî de bi Îranê re li hev bike.
Trump ji televîzyona NBC re axivî û got, “Îran dixwaze lihev bike, lê belê merc bi temamî baş nîne.” Trump got, peymaneke gengaz divê li ser bingeha wê yekê be ku Tehran bi temamî dest ji bernameya xwe ya nukleerî berde.
Îran heta niha tevlîbûna li hevdîtinên ji bo agirbestê red dike. Her wiha bi bandora şer buhayê petrolê di asta navneteweyî de zêde dibe.
