Rêveberiya Xweser a bajarê Kobanê û Komîteya amadekar a çalakiyan a Newrozê bi boneya 21’ê Adarê Cejna Newrozê daxuyanî da û agirê Newrozê pêxist.
Bi dehan endamên saziyên Rêveberiya Xweser, partiyên siyasî, saziyên sivîl, rêxistinên jinan tev li daxuyaniyê bûn.
Daxuyanî li pêş avahiya Rêveberiya Xweser bi zimanê Kurdî ji aliyê Cîgira Hevserokatiya Encûmena Cibicîkar a bajarê Kobanê Mizgîn Xelîl û bi zimanê Erebî ji aliyê Hevserokê Meclisa Rêveberiya Xweser a bajarê Kobanê Ferhan Hec Îsa ve hate dayîn.
Daxuyanî bi vî rengî ye:
“Gelê Kurd li çar aliyên cîhanê û li her çar parçeyên Kurdistanê her sal û ji hezaran salan ve, di 21’ê Adarê de cejna Newrozê pîroz dike. Ev roj ji bo gelê Kurd xwedî girîngiyek taybet e, ji ber ku sembola têkoşîna li dijî hemû cureyên zilm û zorê ye, nasname, çand û dîroka gelê Kurd a ku bi têkoşîna ji bo azadî û kerama mirovan tijî ye, temsîl dike.
Di vê salê de jî pîrozbahiyên Newrozê li Kobanê di şert û mercên dijwar de tên pêkanîn. Bajar û niştecîhên wê bi pirsgirêkên mezin re rû bi rû ne, ji ber êrişên hêzên leşkerî yên girêdayî hikûmeta demkî ku li gundên wê hatine kirin, her wiha ji ber dorpêça ku zêdetirî 50 rojan li ser bajarê hatiye sepandin. Ev rewş bûye sedema giranbûna krîza mirovahî û tenduristiyê.
Em encamên şerê li herêmê û êşa malbatên esîr û wendabûyan ji bîr nakin; wan ku bi hêvî û çavdêriya mezin li vegera zarok û kesên xwe rûniştine. Di vê çarçoveyê de em bang li hikûmeta demkî dikin ku esîran serbest berde û çarenûsa wendabûyan eşkere bike, da ku alîkariyê li avakirina aştî û dadmendiyê bike û hemû xalên peymanên têkildarî herêmê bên cîbicîkirin.
Tevî hemû dijwariyên ku bajarê Kobanê û gundewarê wê dîtine, gelê herêmê hîn jî bi berxwedan û xwebawerî li ser piyan e, û bi îrade û israra xwe têkoşîna xwe didomîne da ku hemû pirsgirêkan derbas bike û aramiya herêmê were misogerkirin.
Em di komîteya amadekar a çalakiyên Newrozê de, bang li hêz û partiyên siyasî yên Kurd dikin ku di vê qonaxa hesas de ji bo yekitiya Kurdî bixebitin, da ku mafên rewa yên gelê Kurd bêne parastin.
Em careke din girîngiya ku mafên Kurd di destûra Sûriyeyê de bêne tesbîtkirin, û pêdiviya domandina têkoşînê ji bo avakirina Sûriyeyeke demokratîk ji bo hemû Sûriyîyan nîşan dikin. Di heman demê de em li dijî gotinên kîndariyê û hemû kesên ku wê belav dikin radiwestin, ji ber ku ew bandorên xeternak li ser aştî û aramiya civakê dikin.
Ji vê derê em ragihînin ku pîrozbahiyên girseyî yên Newrozê li bajarê Kobanê û gundewarê wê bi diruşma,”Bi ruhê yekitiya neteweyî em agirê Newrozê geş bikin” dest pê dikin. Her wiha bang li gelê Kurd û pêkhateyên din dikin ku bi awayekî çalak tev li Cejna Newrozê bibin.
Pîrozbahiya navendî ya Newrozê dê di 21’ê Adarê de li ser Girê Miştenûr were lidarxistin, û çalakiyên wê dê di saet 10:30ˊê sibehê de dest pê bikin.”
Piştî xwendina daxuyaniyê, agirê Newrozê hate pêxistin û li ber stranên şoreşgerî govend hate gerandin.
