Meclisa Malbatên Şehîdan a bajarê Dêrikê merasîma cenaze yê şervanên QSD’ê Raman Soro (Abdullah Dadak) ê 20’ê Çile li ser rêya Ebyed şehîd bûye, Şerzan Sason (Îsmet Atalayî) yê 18’ê Çile şehîd bûye û Milîtan Rojava (Mihemed Xişo) yê 17’ê Çile li Reqayê şehîd bûye li dar xist.
Merasîm li Pakrewangeha Şehîd Xebat bi beşdariya şêniyên Dêrik, Çilaxa û Girkê Legê hat lidarxistin. Girse bi dirûşma ‘Şehîd Namirin’ karwanê şehîdan pêşwazî kir.
Piştî deqeyek rêzgirtinê, endamê Meclisa Malbatên Şehîdan a bajarê Dêrikê Mihemed Adil axivî û got: “Şehîd sînoran nas nakin. Ji tevahiya Kurdistanê tev li şoreşa Rojava bûn û şehîd bûn. Em soz didin şehîdan ku rêça wan bişopînin û deskeftiyên bi fedakariya wan hatin bidestxistin, biparêzin.”
Li ser navê Yekîneyên Parastina Jin (YPJ) fermandar Viyan Efrîn axivî û wiha got: “Di şerê li ser me hatî ferzkkirin de, helwesta şervanan a li qada berxwedanê û şehadeta wan di rêya parastina rûmetê de hişt ku em îro li ser lingan bin û serbilind in. Berxwedana wan di dîrokê de hat nivîsandin.”
Piştî axaftin bi dawî bûn wesîqeyên şehîdan hatin xwendin. Cenazeyên şehîdan bi dirûşmên ‘Şehîd Namirin’ spartin axê.
DIRBÊSÎ
Şervanê QSD’ê Mihemed Mutai Yûsif ê ku 18’ê Çile (2026) li bajarokê Mekmenê yê Hesekê de şehîd bibû, îro bi merasîmekê ji aliyê bi sedan şêniyên Dirbêsiyê û koçberên Serêkaniyê ve hat oxirkirin. Merasîmê oxirkirinê ji aliyê Meclisa Malbatên Şehîdan a bajarê Dirbêsiyê li Pakrewangeha Şehîd Rustem Cûdî ya li gundê Ber Kevirê hat lidarxistin
Piştî deqeya rêzgirtinê, endamê Meclisa Malbatên Şehîdan a Kampa Waşûkanî Beşar Koş axivî û got: “Ez hemû şehîdên Rojava bibîr tînim. Ji bo parastina herêmê ji êrîşan canê xwe feda kirin. Em ê rêya wan bişopînin û rêwîtiya wan a têkoşînê berdewam bikin.”
Endamê Meclisa Leşkerî ya Amûdê Berxwedan Amûdê jî diyar kir ku şehîd Mihemed ji malbateke welatparêz a Serekaniyê ye, piştî êriş dest pê kir berê xwe da eniya şer. Berxwedan Amûdê got: “Gelê Kurd ji bo parastina rûmet û xaka xwe têdikoşe. Di vê rêyê de gelek bedel û şehîd dan. Têkoşîn bi fedakariya şehîd û şervanan didome.”
Di dawiya merasîmê de wesîqeya şehîd Mihemed Yûsif hat xwendin û radestî malbata wî hat kirin.
Cenazeyê şehîd bi tilîliyan spartin axê.
