Pîrozbahiya cejna Newrozê ya Amedê, tevî barîna baranê jî didome û coşeke mezin heye. Bi sed hezaran kesan dirûşma “Bijî Serok Apo” berz kir û li rexa din jî li ber stranan govend gerand. Bernameya pîrozbahiyê didome û li gelek noqteyan hêj jî gel diherike qada Newrozê.
Piştî sînevîzyona ji bo bîranîna Sirri Sureyya Onder, peyama Rêber Apo hate xwendin. Di vê navberê de bêdengiyeke mezin li qadê hebû.
Piştî xwendina peyamê, girseyê bi yekdengî dirûşma “Bijî Serok Apo” berz kir.
Çetîn Arkaş ku li Girtîgeha Îmraliyê bi Rêber Apo re mabû û piştre tehliye bûbû, xîtabî sed hezaran kir.
Çetîn Arkaş diyar kir ku li ser navê hemû hefs û zindanan gel silav dike û Newroza wan pîroz dike Arkaş, wiha domand: “Newroza azadiyê ya Rêber Apo pîroz be. Min di temenê xwe de cara ewil e Newrozeke wiha bi girseyî dît. Ji ber wê jî gelek bi kelecan im. Newroza ku herî qelebalix beriya 35 rojan li eywana Abdî Îpekçî ya Stenbolê pîroz kiribû. Em deh hezar kes bûn. Me bi hevalan re keyfxweşiya xwe parve kiribû. Gelek ji wan hevalan niha di nav me de nînin. Em her çiqas qelebalix bibin jî ewqas kêm in. Kêmasiya wan hîs dikin. Aliyekî me keyfxweş e ku em bi we re ne aliyekî me jî xemgîn e ku kesên em dixwazin bi we re bin ne li vir in. Em ji vê qadê soz didin.
Ew zarokên dayikên me yên bi qîmet bûn. Niha wan hîs bikin. Soza we hemûyan ji wan re heye. Di vê têkoşînê de gelek dayikan zarokên xwe winda kirin. Em bi bedelên mezin heta van rojan hatin. Gelek dayikên me yên biqîmet me di demên nêz de winda kir. Dayikek me di demek nêzîk de koç kir. Gotina wê wiha bû teqez serbikevin. Em di kesayeta wê dayîkê de soz didin hemû dayikan em ê serbikevin teqez serbikevin.
Gelê me yê hêja, Em di pêvajoya Aştî û Civaka Demokratîk de pêvajoyê pêşwazî dikin. Sed salên dawî yên înkarê çi bi kê da qezenckirin? Divê ev înkar êdî ji holê bê rakirin. Ma dê gelek heta kengî jinedîtî ve were? Gel dê di vê Newrozê de têkoşîna azadiyê bi dest bixin. Ev qad diqîre ku divê Kurd êdî azad bibin.
Werin em di vê Newrozê de hevdîtina gelan jî lê zêde bikin. Rojava, Rojhilat, Başûr û Bakur divê bi entegrasyona demokratîk bigihe yekitiya neteweyî. Em dizanin aştî wêrekî divê, lê heke firsend derketibin holê divê bên nirxandin. Em banga xwe ya ji bo aştiyê gavê biavêjin ji vir careke din dubare dikin. Esareta Îmraliyê êdî nikare were domandin. Divê şert û mercên Rêber Apo yên ragihandinê bên avakirin. Heke ev şert pêk werin dê Serok Apo were vê qadê bi xwe biaxive.
Rêber Apo û hevrêyên wî tu car ji jiyana birûmet tawîz nedan. Hatin kuştin, di girtîgehan de rizîn hatin sirgunkirin lê tu car bipaş ve gav neavêtin. Soza ku me daye dayikên me û şehîdên xwe heta ku ev têkoşîn bi azadiyê tacîdar bibe wê bidome. Ev firsend gelek nêzî me ye. Rojên ku serokatiya me û hevalên me azad bibin wê bibin rojên rast ên cejnê. Ez cejna we ya Remezanê û Newrozê pîroz dikim. Em ê bi serbikevin.”
Piştî Çetîn Arkaş, Hevserokê Giştî yê DEM Partiyê Tuncer Bakirhan derker ser dikê.
