Bi hezaran kes beşdarî pîrozbahiya li Qada Stasyonê ya li Xarpêtê bûn. Endama Meclîsa Ciwanan a DEM Partiyê Havîn Cîrît diyar kir ku Newroz ne tenê cejnek e, di heman demê de nîşaneya berxwedaneke dîrokî ye.
Parlamentera Dersimê Ayten Kordû jî anî ziman ku Newroz li dijî zilmê nîşaneya berxwedanê ye û berxwedêr bi bîr anî.
Ayten Kordû got, “Em ê civaka demokratîk tekez ava bikin. Jin wê pêşengên vê pêvajoyê bin, ciwan wê pêşeng bin, gelê me wê pêşeng be. Em neçar in ku ji bo vê hîn bêhtir xwe bi rêxistin bikin. Têkoşîna demokrasî, azadî û wekheviyê herî zêde li ser milê jin û ciwanan e.”
Dayika Aştiyê Fatma Tosûn jî ji bo aştiyê bang kir. Adalet Kaya jî got, “Pêvajoya ku saleke dewam dike divê êdî bi gavên şênber bi pêş ve biçe. Yek ji aliyan berpirsyariya xwe pêk aniye. Êdî divê dewlet gavên qanûnî yên pêwîst biavêje. Em ji vê derê, ji Xarpêtê banga xwe dubare dikin.”
Piştî axaftinan agirê Newrozê hate dadan û girseya gel li ber stranan govend gerand.
Li Çewlîgê pîrozbahî li taxa Sarayê pêk hat û gelek kes beşdar bûn. Omer Farûk Hulaku li pîrozbahiyê axivî û anî ziman ku Newroz nîşaneya nasname û berxwedana gelê Kurd e.
Aktîvîsta TJA’yê Gulistan Atasoy jî bal kişand ser tecrîda li ser Rêber Apo û ji bo azadiyê bang kir. Gulistan Atasoy got, “Em şehîdên xwe bi rêzdarî bi bîr tînin ku bi saya wan em Newrozê bi rengekî azad pîroz dikin. Em ê bi mezinkirina têkoşînê berpirsyariya xwe ya li pêşberî wan bi cih bînin.”
Pîrozbahî piştî gerandina govendê û axaftinan bi dawî bû.
